Hewlêr (Rûdaw) - Serokkomariya Îraqê ji ber ku mûçeyên karmendên Herêma Kurdistanê nehatine dayîn, li dijî Serokwezîr Îraqê û Wezîra Darayî ya Îraqê li Dadgeha Federal gilî kir.
Rêvebirê Giştî yê Pêwendiyên Navneteweyî û Rêxistinan ê Serokatiya Îraqê Hawre Tofîq derbarê giliya ku ji aliyê Serkkomariyê ve li dijî Serokwezîrê Îraqê Mihemed Şiya Sûdanî û Wezîra Darayî Tayf Samî hatiye kirin, daxuyanî da.
Hawre Tofîq diyar kir ku gilî 20ê Kanûna Paşîn a 2025an de hatiye kirin û tevî ku 19 roj derbas bûne hîn biryarek nehatiye dayîn.
Bi gotina Hawre Tofîq ew pêvajoyê dişopînin.
Hawre Tofîq li ser hûrgiliyên giliyê ku pêşkêşî dadgehê hatiye kirin got:
"Me ji Dadgeha Federal xwest ku biryarekê derbixe da ku mûçeyên karmendên Herêma Kurdistanê bi rêkûpêk û bê derengketin werin dayîn.
Divê pirsgirêkên teknîkî û îdarî rê li ber dayîna mûçeyan negirin."
Tofik her wiha diyar kir ku di serlêdana qanûnî ya ji aliyê Serokomariyê ve hatiye kirin de, hatiye xwestin ku Dadgeha Federal bangî Parlamentoya Îraqê kir da ku xala 12 a benda Cyê ya Yasaya Budceya Federal a têkildarî mesrefên hilberîna petrolê ya Herêma Kurdistanê bicih bîne.
Parlamentoya Îraqê 2yê Sibata 2025an di yasaya budceyê de guherîn kir û xala têkildar pejirand.
Li gorî xala 12an a budceyê, ji bo her bermîl petrola ku li Herêma Kurdistanê tê hilberîn 16 dolar hatibû pêşniyarkirin lê Hikûmeta Îraqê ev rêje wekî 6 dolar diyar kir.
Heman xal çarçoveya qanûnî ya hinartina petrola Herêma Kurdistanê jî dihewîne.
"Hemû alî li bendê ne ku Dadgeha Federal biryara xwe ya destûrî bide"
Hawre Tofîk derbarê çarçoveya pêvajoyê de got:
"Rûniştina dadgehê dê 12ê Sibatê were kirin. Hemû alî li bendê ne ku Dadgeha Federal biryara xwe ya destûrî bide."
Hawre Tofîk bal kişand ser hestyariya pêvajoyê û wiha domand:
"Serokkomarê me Letîf Reşîd dixwaze ku ne tenê mûçeyên karmendên Herêma Kurdistanê lê yên hemû karmendên dewletê yên li seranserê Îraqê bi rêkûpêk werin dayîn.
Ji ber vê yekê me gavên yasayî avêtin."
Hawre Tofiq got ku Serokkomarê Îraqê ji Dadgeha Federal xwestiye ku Wezareta Darayî ya Îraqê ji bo dayîna mûçeyên mehên borî û paşerojê yên karmendên Herêma Kurdistanê were pabendkirin.
Greva birçîbûnê li Silêmaniyê
Li Silêmaniyê ji ber nedana mûçeyan, hin mamoste û karmend 13 roj in dest bi greva birçîbûnê kirine.
Çalakvan dixwazin ku mûçeyên wan di demeke zû de bên dayîn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse