Hewlêr (Rûdaw) - Ekrem Îmamoglu got, " Nirxandina van kiryarên xerab ên li dijî mafê hilbijartinê û îradeya welatiyên me yên Kurd û pêvajoyên çareseriyê yên ku Serokê Giştî yê MHPyê Birêz Devlet Bahçelî daye destpêkirin di heman demê de zehmet bûye."
Bi biryara Wezareta Karên Navxwe ya Tirkiyeyê Hevserokê Şaredariya Bajarê Mezin a Wanê Abdullah Zeydan ji kar hat dûrxistin û parêzgarê Wanê Ozcan Balci li şûna wî wekî qeyûm hat danîn.
Serokê Şaredariya Bajarê Mezin a Stenbolê Ekrem Îmamoglu derbarê danîna qeyûm a ser Şaredariya Wanê daxuyaniyek belav kir.
"Meqam ne milkê tapûkirî yê kesî ne"
Îmamoglu bertek da biryara Wezareta Karên Navxwe ya Tirkiyeyê û wiha got:
"Kesên ku beriya hilbijartinan `li gorî mercên di qanûnê de hatine diyarkirin` bûn, mixabin piştî ku têne hilbijartin bi biryarên dadgehê û sûcdariyan ji kar têne dûrxistin yan jî têne binçavkirin, ev yek bi demokrasiyê re li hev nake.
Dawiyê qeyûm li ser Şaredariya Bajarê Mezin a Wanê hatiye danîn.
Nirxandina van kiryarên xerab ên li dijî mafê hilbijartinê û îradeya welatiyên me yên Kurd û pêvajoyên çareseriyê yên ku Serokê Giştî yê MHPyê Birêz Devlet Bahçelî daye destpêkirin di heman demê de zehmet bûye.
Ev siyasetên ku di nav xwe de nakokî ne, hişê miletê me tevlihev dike û hesteke wisa çêdike ku di rêveberiya welêt de dubendî heye.
Teqîna hêrsê ya ku piştî ku partiya desthilatdar di hilbijartinên dawî de têk çû peyda bûye; ji mixalefetê, ji cîhana kar, ji rêxistinên sivîl, ji hunermend, karker, malnişîn, ciwan, jin û kesên bi mûçeyê herî kêm dixebitin hesab dipirse.
Hinek kes ji 86 milyon welatiyên me yên welatperwer hesab dipirsin. Milet hesab nade, hesab dipirse.
Meqam ne milkê tapûkirî yê kesî ne. Yên ku xwe xwediyê welêt û milet jî kirêdar dihesibînin êdî têk çûne. Hûn çi qasî zilmê bikin jî, ev dawî eşkere ye."
Çi bûbû?
11ê Sibata 2025an, 5emîn Dadgeha Cezayê Giran a Amedê 3 sal û 9 meh cezayê girtîgehê li Hevserokê Şaredariya Bajarê Mezin a Wanê Abdullah Zeydan birîbû.
Piştî ku cezayê girtîgehê li Abdullah Zeydan hat birîn, xelkê ji ber îhtimala danîna qeyûm li ber avahiya şaredariyê dest bi nobetê kiribû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse