Karsazê Kurd xaniyek da zarokê ku got 'xaniyê me nîne'

Hewlêr (Rûdaw) - Karsazê Kurd Yilmaz Uzeyiroglu, xaniyek da wî zarokê ku dema ji bin kavilên erdhejê hat rizgarkirin gotibû; “xaniyê me nîne, wî cuzdanî jî bînin, dibe ku em bi wî pereyî xaniyekî bikirin.”

Li parêzgeha Mereşê ya Bakurê Kurdistanê, Halil Sami Kulotu yê 7 salî û birayê wî Yunus Efe yê 3 salî piştî erdheja 6ê Sibatê bi 4 rojan 10ê Sibatê ji bin kavilên Apartmana Gonca ji aliyê tîmên rizgarkirinê ve bi saxî hatibûn rizgarkirin.

Halil Samî dema ji aliyê tîman ve ji bin kavilan hat derxistin, ji wan re got: “Keko ez dê tiştekî bêjim, bavê min mal emanete min kir. Çenteyekî reş heye, di nav de cuzdan heye. Pere tê de ne. Xaniyê me jî nîne. Dibe ku em bi wî pereyî xaniyekî bikirin.”

Dê, Bav û xwîşka Halil Sami di bin kavilan de canê xwe jidest dan.

Piştî dîmenên Halil Sami li ser sosyal medyayê belav bûn Serokê Kompanya Uzeyirolgu Yilmaz Uzeyirloglu gihişte Halil Sami û kesûkarên wî û mizgîniya xêrê da wan, ku dê li Îzmîrê xaniyekî bide Halil Sami û birayê wî.

Uzeyiroglu yê dîmenên axavtina xwe û Halil Sami li ser sosyal medyayê belav kir ji Rûdawê re got: “Dîmenên wî bandoreke zêde li min kirin. Min hewl da ez bigihêjim wan û ez bi wî û xalê wî re axivîm. Niha li nexweşxaneyê ne. Em dê ji bo serdana wan biçin Mereşê. Me di avahiyên xwe yên li navçeya Konak a Îzmîrê xaniyek da wan. Berê kurekî min hebû, niha sê kurên min hene.”

Li Mereşê Halîlê 7 salî û birayê wî Yunus Efe (3 salî) ji bin xirbeyan hatin rizgarkirin. Lê dê, bav û xwişka xwe ji dest dan.
Halîl daxwza pereyê xwe kir û got: "Bavê min mal emanet da min. Mala me tune, bi kêmanî em dikarin bi wî pereyî xaniyek bikirin."#Erdhej #ErdhejaMereşê pic.twitter.com/zQRkFglIMs

— RudawKurdi (@RudawKurdi) February 12, 2023

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger