Hewlêr (Rûdaw) - AFADê ragihand ku ji ber karesata agirê zeviyan Amed û Mêrdînê wekî “Herêma karesatê” hatin diyarkirin.
Serokatiya Rêveberiya Karesat û Rewşên Bilez (AFAD) li ser mijarê daxuyaniyek belav kir.
AFADê da zanîn ku ji ber agirên 20ê Hezîrana 2024an ku li Amed û Mêrdînê derketibû herêm wek “Herêma Karesatê” hatiye ragihandin û ji bo herêmê 5 milyon lîreyên Tirkî (milyonek û 700 hezar dolar) alîkarî hatiye şandin.
AFADê di daxuyaniyê de got: “Dewleta me hemû derfetên xwe bi awayekî bilez seferber kiriye.
Ji bo alîkariya malbatên qurbaniyên agir 3 milyon lîre ji Amedê û 2 milyon lîre jî ji Mêrdînê re hatiye şandin.
Herwiha ji bo zerara çandiniyê û ajelan jî Serokkomariyê û AFADê 50 milyon lîre bo herêmê şandiye.”
Çi bûbû?
20ê Hezîranê di navbera navçeya Çinarê ya Amedê û navçeya Şemrexê ya Mêrdînê de şewateke mezin çêbû û midexaleya destpêkê ji aliyê welatiyan hatibû kirin.
Ji ber ba û bahozê agir li nava erdên 8 gundan belav bû.
Di encama şewatê de 15 kesan canê xwe ji dest da û xisareke gelekî mezin a madî çêbû.
Piştî şewatê lêkolîn hatibû destpêkirin û li gorî lêkolîna destpêkê ya Serdozgeriya Komarî ya Amedê şewat ji têlên elektirîkê derketiye û bi ba û bablîsokê re gur û belav bûye û li Mêrdîn û Amedê 15 hezar donim erde çandiniyê li ber xwe girtiye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse