تامی بروس، گوتەبێژی وەزارەتی دەرەوەی ئەمریکا و دیار کوردە، بەڕێوەبەری نووسینگەی رووداو لە واشنتن:
رووداو دیجیتاڵ
گوتەبێژی وەزارەتی دەرەوەی ئەمریکا لەبارەی پێکهێنانی حکومەت نوێی هەرێمی کوردستان بە رووداوی راگەیاند، کە هانی هەموو لایەکیان داوە بەزووترین کات حکومەت پێکبهێنن و ئاماژە بەوەش دەکات "دیموکراسییەکی بەهێز" لە هەرێمی کوردستان، پێویستە بۆ پاراستنی سەقامگیری و ئاسایشی هەموو عێراق.
رۆژی دووشەممە، 31ی ئاداری 2025، تامی بروس، گوتەبێژی وەزارەتی دەرەوەی ئەمریکا لە وەڵامی چەند پرسیارێکی دیار کوردە، بەڕێوەبەری نووسینگەی تۆڕی میدیایی رووداو لە واشنتن، لەبارەی کردنەوەی کۆنسووڵخانە نوێیەکەی ئەمریکا لە هەولێر رایگەیاند، "کردنەوەی گەورەترین کۆنسووڵخانەی ئەمریکا، ئاماژەیە بە پابەندبوونی ئیدارەی ترەمپ بۆ هەرێمی کوردستان و پتەوکردنی هاوئاهەنگییە دیپلۆماسییەکانی نێوان واشنتن و هەولێرە."
لەوبارەیەوە، تامی بروس لە وەڵامی رووداودا رایگەیاند، "لەگەڵ کردنەوەی ئەم کۆنسووڵخانە نوێ و گەورەترینە لە هەولێر، مانگی داهاتوو، یاخود چاوەڕێ دەکرێت ئەم ساڵ بکرێتەوە، رەنگدانەوەی پابەندبوونی ئەمریکایە بۆ هەرێمی کوردستانی عێراق. کۆنسووڵخانەی نوێ هاوبەشییەکەمان و هاوئاهەنگییە دیپلۆماسییەکەمان لەگەڵ هەرێمی کوردستان و حکومەتی عێراق پتەوتر دەکات، لەنێویشیاندا ئامانج و ئاڵنگارییە هاوبەشەکان و رووبەڕووبوونەوەی تیرۆریزم و گەشەپێدانی ئاشتییەکی درێژخایەن."
پێنج مانگ بەسەر هەڵبژاردنی پەرلەمانی کوردستان تێپەڕیوە، بەڵام حکومەتی نوێ پێکنەهێنراوە. گوتەبێژی وەزارەتی دەرەوەی ئەمریکا لەوبارەیەوە گوتی: "ئێمە هانی هەموو لایەکمان داوە بەخێرایی حکومەت پێکبهێنن و دیموکراسییەکی خۆڕاگر و بەهێز وەکو هەمیشە باسی لێوە دەکەین لە هەرێمی کوردستانی عێراق، پێویستە بۆ پاراستنی سەقامگیریی و ئاسایشی عێراق. بۆیە هانیان دەدەین حکومەت پێکبهێنن و بەخێراییش ئەو کارە بکەن."
دەقی وەڵامی تامی بروس، گوتەبێژی وەزارەتی دەرەوەی ئەمریکا بۆ دیار کوردە، بەڕێوەبەری نووسینگەی رووداو لە واشنتن:
تامی بروس: "راستییەکەی ئەوەی دەتوانم پێت بڵێم ئەوەیە؛ لەگەڵ کردنەوەی ئەم کۆنسووڵخانە نوێ و گەورەترینە لە هەولێر مانگی داهاتوو، یاخود چاوەڕێ دەکرێت ئەم ساڵ بکرێتەوە، رەنگدانەوەی پابەندبوونی ئەمریکایە بۆ هەرێمی کوردستانی عێراق. کۆنسووڵخانەی نوێ هاوبەشییەکەمان و هاوئاهەنگییە دیپلۆماسییەکەمان لەگەڵ هەرێمی کوردستان و حکومەتی عێراق پتەوتر دەکات، لەنێویشیاندا ئامانج و ئاڵنگارییە هاوبەشەکان و رووبەڕووبوونەوەی تیرۆریزم و گەشەپێدانی ئاشتییەکی درێژخایەن. دووەم لەبارەی حکومەتی نوێی هەرێمی کوردستانی عێراق، دەتوانم پێت بڵێم لەبارەی پێکهێنانی حکومەت لەو دوو زۆنە و ئەگەر هێزێکی یەکگرتوو هەبێت لەژێر چەتری ئەو هێزە یەکگرتووە، ئەوەیان باشترە لە حکومەتی هەرێمی کوردستان بپرسیت بۆ قسەکردن لەسەر کاروباری ناوخۆ کە جێی بایەخی تۆیە. ئێمە هانی هەموو لایەکمان داوە بەخێرایی حکومەت پێکبهێنن و دیموکراسییەکی خۆڕاگر و بەهێز وەکو هەمیشە باسی لێوە دەکەین لە هەرێمی کوردستانی عێراق پێویستە بۆ پاراستنی سەقامگیریی و ئاسایشی عێراق. بۆیە هانیان دەدەین حکومەت پێکبهێنن و بەخێراییش ئەو کارە بکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ