هەڵەیەک روویدا! دووبارە هەوڵبدە
مارین لو پین، سەرۆکی پارتی بەرەی نیشتمانی فەرەنسا. وێنە: AFP
رووداو دیجیتاڵ
دادگەیەکی فەرەنسا قەدەخەی پێنج ساڵی خستەسەر خۆبەربژێرکردنی سەرۆکی پارتی بەرەی نیشتمانی وڵاتەکەی بۆ پۆستی سەرۆکایەتی وڵات، کە بڕیارە ساڵی 2027 هەڵبژاردنی بۆ بکرێت. دادگە سەرۆکی پارتەکەی بە ساختەکاری تۆمەتبار کرد و ئەمەش ناڕەزایەتی نێوخۆیی و نێودەوڵەتی لێکەوتەوە.
رۆژی دووشەممە، 31ی ئاداری 2025، دادگەیەکی پاریس بڕیاریدا کە مارین لو پین، سەرۆکی پارتی بەرەی نیشتمانی فەرەنسا بێبەش بکات لەوەی خۆی بۆ سەرۆکایەتی وڵاتەکەی بەربژێر بکات، کە بڕیارە ساڵی 2027 هەڵبژاردنی بۆ بکرێت. قەدەخەکە بۆ پێنج ساڵە، هەروەها ئەو بە شەش ساڵ زیندانیش سزادراوە.
دادگەکە لو پینی بە چوار ساڵ زیندانی سزاداوە، بەڵام زیندانی ناکەن بەڵکو دوو ساڵی بۆ دوادەخەن و دوو ساڵیش لە ماڵەکەیدا دەهێڵدرێتەوە. دوای خوێندنەوەی بڕیارەکە، خانمە سیاسەتڤانەکە هیچی نەگوت تەنیا ئەوە نەبێت کە رەتیکردەوە هیچ هەڵەی کردبێت.
سەرۆکی پارتی بەرەی نیشتمانی فەرەنسا ساڵانی 2004 بۆ 2007 ئەندامی پەرلەمانی ئەورووپا بووە. بە گوێرەی بڕیاری دادگە، ئەو لەو ماوەیەدا ئەو پارەیەی کە بۆ دانانی یاریدەدەر پێیدراوە کەسانێکی پێداناوە کە لەبری ئەوەی کاری یاریدەدەری بکەن، کاری سیاسییان بۆ بەرژەوەندی پارتی بەرەی نیشتمانی کردووە. بە گوێرەی بڕیارەکە، کۆی پارەکە نزیکەی 3.1 ملیۆن دۆلار بووە.
تیمی پارێزەرانی سەرۆکی پارتی بەرەی نیشتمانی فەرەنسا رایانگەیاند، داوای تێهەڵچوونەوە بە بڕیارەکەدا دەکەن. ژمارەیەک بەرپرسی پارتەکەی و پارتە هاوبیرەکانیان رەخنەیان لە بڕیارەکە گرت.
جۆردان باردێلا، سەرکردە لە پارتی بەرەی نیشتمانی رایگەیاند، بڕیارەکە "ئابڕوچوونێکی دیموکراسییە" و داوای لە خەڵکی وڵاتەکەی کرد دژایەتی بڕیارەکە بکەن بۆ ئەوەی پشانی بدەن کە "ویستی خەڵک بەهێزترە".
لە بڕیارەکەدا ئەوەش هاتووە، جگە لە لو پین لێکۆڵینەوە لەگەڵ 23 سەرکردە و ئەندامی دیکەی پارتەکە کراوە و سزادراون بەوەی کە نەتوانن تاوەکو پێنج ساڵی دیکە خۆیان بۆ پۆستێکی حکومەتی بەربژێر بکەن.
دوای بڕیارەکە بەشێک لە سەرکردەی پارتە راسترۆکانی ئەورووپا پاڵپشتی خۆیان بۆ لو پین دەبڕی. ڤیکتۆر ئۆربان، سەرۆکوەزیرانی هەنگاریا کە سەرۆکی پارتی هاوپەیمانی سڤیلی راستڕۆی دژەکۆچبەرە لە ئێکس بڵاویکردەوە، "من مارینم". گیرت ویلدێرس، پەرلەمانتاری هۆڵەندیش لە ئێکس دەڵێت، "متمانەم بەوەیە کە لە داوای تێهەڵچوونەوەیدا سەرکەوتوو دەبێت و دەبێتە سەرۆکی فەرەنسا".
بڕیارە ساڵی 2027 هەڵبژاردنی سەرۆکایەتی فەرەنسا بکرێت. هەڵبژاردنەکە دوو خولە. لە خولی یەکەمدا پێویستە یەکێک لە بەربژێرەکان 51٪ی دەنگەکان بباتەوە، ئەگەر نا هەڵبژاردنەکە دەچێتە خولی دووەم و ئەو دوو بەربژێرەی لە خولی یەکەمدا زۆرترین دەنگیان هێنا دەچنە کێبڕکێوە. ئەوەی دەنگی زۆرینەی بردەوە دەبێتە براوەی هەڵبژاردن.
بە گوێرەی دواین راپرسی میدیای فەرەنسا، لو پین بە ئاسانی دەتوانێت ببێتە سەرۆکی فەرەنسا.
بە گوێرەی دەستووری فەرەنسا، هیچ کەسێک نابێت لە دوو خول زیاتر سەرۆکی وڵاتەکە بێت. ئیمانوێل ماکرۆن، سەرۆکی فەرەنسا ناتوانێت خۆی بەربژێربکاتەوە، چونکە دوو خولە سەرۆکی وڵاتەکەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ