ڤیدیۆ؛ دا چەند جوان بیت، ئەگەر مە ئەڤە کربا

 

 

هەر جارەکا دهۆک و زاخۆ یاریێ بکەن، بەریا یاری بهێتەکرن، گرژی و ئاڵۆزینە، چەند رۆژا بەری یاریێ هەریەک دێ گوتنەکا خراپ کەت، هەریەک دێ ئاگرێ ناڤا پشتەڤانێن یانا دیکە خۆشکەت، بۆچی بەردەوام ئەم دڤێ چەندێدا هەڤڕکێن یەک بین؟ بۆ هەڤڕکیا بۆ کرێتکرنا یەک بیت؟ بۆ ئەم هەرچی جوانییەک یەکدوو هەنە کرێت دکەین؟ بۆ ئەم هندەک باشتر هزر نەکەین و ئیدی خاڵەکا دوماهیێ نەدانین؟

 

دهۆک و زاخۆ ژ جوانترین یانەیێن کوردستان و عێراقێنە، خودانا جوانترین و باشترین پشتەڤانانە و هەر دەما یارییەکا وان د یاریگەها وان دابیت، بەحس بەحسێ وانە و ئەو ترێندێنە سۆشیاڵ میدیایێنە، لێ نە بەرامبەری هەڤبن.

 

مادەم دهۆک ل یارییا دوماهیێ یا جامە کەنداوە، زاخۆ هەڤڕکا برنا خولا عێراقێیە، مادەم هەردوو یانە دهێنە پشتەڤانیکرن و وەها کاریگەر و ب ناڤ و دەنگن، بۆچی ئەم ئەڤڕۆ نەکەینە رۆژەکا نوو، بۆچی ئەم ئەڤڕۆ دەستێن خو ب کریار نەکەینە ناڤا دەستێن یەک و بێژین، هەتا ڤێرێ بەسە، ئەوا د دیرۆکێدا نەهاتییە کرن، ئەوا هندە ساڵە ب شەڕ دهێتە تەمام کرن، دێ ئەم ب جوانی، ئاشتی و گیانەکێ وەرزشی تەمام کەین، ئیدی دێ ب کردار دەستێن هەڤ گرین و دێ برایەتیێ، خزمایەتیێ و یەک ماڵیێ نیشاندەین.

 

بەس هزرا خو بکەن، تنێ هزرا دیمەنێن جوان بکەن، دێ چەند یا جوان بیت، دهۆکییەک و زاخۆییەک، ب درێسێن یانێن یەک لە تەنشتی یەک روونێن و پشتەڤانیێ بکەن، دێ چەند یا جوان بیت، سەرۆکێن هەردوو یانەیان ل تەنشتی یەکبن و پێکڤە تەماشەی یاریێ بکەن، دێ چەند جوان و بالکێش بیتن، پشتەڤانێن هەردوو یانەیا د یاریگەهێن یەک دا ئامادەبن و وەکی هەر یاریا بەرامبەری هەر یانەیەکا دیکە پشتەڤانیا یەک بکەن، لەوما دیمەنێن سڤکاتیکرنێ ب یەک، گوتنێن دوور ژ هەموو بەهایەکێ جڤاکی و خاڵی ژ مرۆڤایەتیێ نەشێن مە ببەنە پێش، نەشێن خزمەتا وەرزشێ بکەن.

 

وەرزش تنێ هەڤڕکییە، هەڤڕکیژی سەرکەفتن، دۆڕاندن و وەکهەڤییە و ئەگەر ئەڤە نەبن، چ جارەکێ حەزا سەرکەفتنێ د هزرا مرۆڤیدا گەش نابیت، ڤێجا بلا بەس بیت، ئەم وەرزشێ وەکی خو ببینین و وەرزشییانە هزر بکەین و تێبگەهین.

 

پشتەڤانێن زاخۆ و دهۆکێ، ب راستی دەما وێ چەندێیە ئەم ل جهێ د دژایەتیکرنێدا هەڤڕکیا یەک بکەین، د پشتەڤانیکرنێدا هەڤڕک بین، د جوان نیشاندانێدا هەڤڕک بین، تۆمارکرنا ئەڤێ دیرۆکێ، بۆ هەر کەس و لایەنەکێ دێ ناڤێ خو ب ئاڤا زێڕی نڤیسیت، دێ چیتە لاپەرێین دیرۆکێدا و دێ بیتە ناڤەک هەردەم ل بیرا هەمووان بیت، لەوما پێتڤییە ل سەر هەردوو یانەیێن دهۆک و زاخۆ، ل ئاستێن بڵند کار ل گەل هەڤبکەن و هەموو رێکارێن پێتڤی بگرنەبەر ئەڤ ئاڵۆزی و گرژییە بگەنە خاڵا دوماهیێ، وەرن ئەڤڕۆکە دا لاپەرەیەکێ نوو ڤەکەین و رابردوو بکەینە دیرۆکەکا ژبیرکری و د لاپەرەیەکێ سپیدا و خاڵی ژ کەرب و کینێ دەستپێبکەین، وەرن سەر ژ نوو دەستپێبکەین و دهۆک و زاخۆ جوانتر و جوانتر بکەین.