رووداو هەولێر
فیدراسیۆنی باسکەی عێراق بەشێوەیەکی فەرمی بڕیاریدا یارییەکانی قۆناخی کۆتایی خولی یانە پلەیەکەکانی عێراق لە شاری هەولێر بەڕێوەبچن.
بەپێی ئەو پلانەی لەلایەن فیدراسیۆنەکەوە داندراوە، یارییەکانی قۆناخی کۆتایی خولی یانە پلەیەکەکانی عێراق بە بەشداریی یانەکانی یەقزە، نەفتی شیمال، سابیس، نەفتی میسان، ئالیاتی شورتە لەگەڵ دهۆک بەڕێوەدەچن. کە بەشێوازی خول بە یەک قۆناخ و لەماوەی ماوەی هەفتەیەکدا لە شاری هەولێر ئەنجام دەدرێت، هەموو یانەکان یاریی لەگەڵ یەکدی دەکەن و سێ یانەی پێشەنگی ریزبەندیی خولەکە سەردەکەون بۆ ریزی یانە نایابەکانی عێراق.
نەوشیروان رۆستەم، جێگری سەرۆکی یانەی سابیس، لە لێدوانێکی تایبەت بە رووداو، رایگەیاند "ئێمە وەک میوانداریی خولەکە بەشێوەیەکەی زۆر باش بەهاوکاری لقی هەولێری یەکێتیی باسکەی عێراق ئامادەکاریمان بۆ میواندارییەکی سەرکەوتووی یارییەکانی خولەکە کردووە".
وەرزی ئەمساڵ یارییەکانی خولی یانە پلەیەکەکانی عێراق بەشێوازی 5 کۆمەڵە بەڕێوەچوون، دواتر یارییەکانی قۆناخی پێشکۆتایی لە هەولێر بوون، ئێستاش کە یانە بەهێزەکان ماونەتەوە قۆناخە چارەنووسسازەکە جارێکی دیکە لە پایتەختی کوردستانە.
لە خولی نایابی عێراق یانەی زاخۆ تاکە تیپی کوردستانییە، هەریەک لە یانەکانی دهۆک و سابیس کە دوو یانەی بەشداری خولی پلەیەکی عێراقن دەیانەوێت بۆ وەرزی داهاتوو ژمارەیەک یانە کوردییەکان لە خولی نایاب زیاد بکەن.
لیژنەی پێشبرکێکان لە یەکێتیی باسکەی عێراق رۆژی 7ـی مانگی چواری ئەمساڵی بۆ دەستپێکردنی یارییەکانی قۆناخی کۆتایی خولی باسکەی یانە پلەیەکەکانی عێراق دیاریکردووە، بڕیارە لەو بەروارە بە رۆژێک کۆبوونەوەی هونەریی ساز بکات و تیروپشک بۆ یارییەکان ئەنجام بدات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ