رووداو دیجیتاڵ
یانەی هەولێر بۆ بەهێزکردنی تیپەکەی لە خولی ئەستێرەکانی عێراق گرێبەست لەگەڵ یاریزانێکی پیشەگەری بەرازیلی واژۆ دەکات.
یانەی هەولێر بەشێوەیەکی فەرمی گواستنەوەی هیگۆر فیلیپی ڤیدال، یاریزانی ناوەڕاستکاری بەرازیلی راگەیاند و یاریزانەکە پەیوەندی بە قەڵای زەردەوە دەکات.
بەپێی زانیارییەکانی رووداو، یانەی هەولێر ماوەی دوو هەفتەیە گفتوگۆ لەگەڵ یاریزانەکە دەکات و ئەمڕۆ بەفەرمی کارەکانی گواستنەوەی یاریزانەکە تەواو بوون.
هیگۆر فیلیپی ڤیدال، یاریزانی هێڵی ناوەڕاستە و بە قاچی چەپ یاری دەکات.
یاریزانەکە تەمەنی 27 ساڵە، پێشتر لە تیپی لاوانی سانتۆسی بەرازیلی، پۆرتۆی پۆرتوگالی، یانەکانی پاس جیانینای یۆنانی، زالگرێسی یۆنانی، گالاکسی ئەفریقای باشوور و چەند یانەیەکی دیکە یارییکردووە.
یانەی هەولێر لە گواستنەوەی ئەم هاوینەدا پێنج یاریزانی پیشەگەری گواستووەتەوە، دوو یاریزانی تونسی، یاریزانێکی جامایکی، یاریزانێکی بەرازیلی و گرێبەستی هێلیۆ مۆنتێرۆی بەرازیلیشی نوێکردووەتەوە.
هەولێر چەند رۆژی داهاتوو، بۆ خۆ ئامادەکردنێکی باشتر بۆ رکابەرییەکانی وەرزی نوێ دەچێتە تورکیا و کەمپێکی مەشق و راهێنان ئەنجامدەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ