رووداو دیجیتاڵ
بەدر متەوع، هێرشبەر و ئەستێرەی تۆپی پێی کوێت پەیامێکی پیرۆزبایی بۆ کریستیانۆ رۆناڵدۆ نارد، دوای ئەوەی ریکۆردەکەی شکێنرا.
رۆناڵدۆ لە یەکەم یاریی پاڵاوتنەکانی گەیشتن بە یۆرۆی 2024 بەرامبەر لیشتنشتاین دوو گۆڵی بۆ هەڵبژاردەکەی تۆمارکرد و یاریی ژمارە 197ـی بەدرێسی هەڵبژاردەکەوە ئەنجامدا، بەمەش بووە خاوەنی ریکۆردێکی نوێ لە مێژووی تۆپی پێی هەڵبژاردەکان و یەکەم یاریزانە زۆرترین یاری بۆ هەڵبژاردەی وڵاتەکەی بکات.
بە ئەنجامدانی ئەو یارییە رۆناڵدۆ ریکۆردی بەدر متەوع، ئەستێرە و کاپتنی هەڵبژاردەی کوێتی شکاند کە پێشتر ئەو یاریزانە 196 یاریی بۆ هەڵبژاردەکەی ئەنجامداوە.
دوای تۆمارکردنی ئەو ریکۆردە لەلایەن رۆناڵدۆوە، بەدر متەوع لە پەیامێکدا لە تویتەر پیرۆزبایی لە رۆناڵدۆ دەکات و نووسیوویەتی "شانازی دەکەم بەوەی کە 196 یاریم بۆ هەڵبژاردەکەم کردووە، شەرەفێکی گەورەیە کە رۆناڵدۆ ریکۆردەکەمی شکاند و ئەو ئەفسانەیەکی راستەقینەیە."
هێرشبەرە کوێتییەکە زیاتر دەڵێت "تۆ ئەفسانە، لەلایەن هەموو یاریزانێکەوە خۆشەویستی، هیوای سەرکەوتنت بۆ دەخوازم و هیوادارم سەرکەوتن و دەستکەوتی زیاترت هەبێت."
لە ژێر توویتەکەی بەدر متەوع، کریستیانۆ رۆناڵدۆ وەڵامی داوەتەوە و بۆی نووسیووە "سوپاس بۆ قسە میهرەبانەکانت بەدر، شانازییەکی گەورەیە کە زۆرترین بەشداریم لە مێژووی تۆپی پێی نێودەوڵەتیدا هەیە، سوپاس و هیوای سەرکەوتن بۆ تۆش دەخوازم."
کریستیانۆ رۆناڵدۆ جگە لەوەی بووە خاوەنی زۆرترین بەشداریی نێودەوڵەتی، یەکەم یاریزانیشە لە مێژووی تۆپی پێی هەڵبژاردەکاندا 120 گۆڵ بۆ هەڵبژاردەکەی تۆماربکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ