رووداو هەولێر
یانەی زاخۆ بەمەبەستی مانەوە لە پێشەنگ و هەنگاونان بەرەو بەدەستهێنانی نازناوی خولی ئەستێرەکانی عێراق بۆ یەکەمجار لە مێژوویاندا، کەمپێکی راهێنان و ئامادەکاری لە پیرمام دەکاتەوە.
لەگەڵ وەستانی خولی ئەستێرەکانی عێراق، سوورپۆشانی خابوور کەمپێکی راهێنانیان بۆ تیپەکەیان لە پیرمام کردووەتەوە، تیپەکە رۆژانە دوو یەکەی راهێنان لەنێو یاریگەی ئارارات ئەنجام دەدات و بڕیارە یارییەکی دۆستانەش لەگەڵ یانەی شەقڵاوە ئەنجام بدات.
سیپان سدیق، یاریزانی یانەی زاخۆ لە لێدوانێکی تایبەت بە رووداو، رایگەیاند "بێگومان ئامادەکارییەکانمان و کەمپی راهێنان بۆ زیاتر رێکخستنەوەی تیپەکەیە لەماوەی وەستانی خول، ئێمە لە ئامادەباشیدان و کەش و هەوای راهێنانەکان زۆر باشە".
یانەی زاخۆ دوای بردنەوەی چواردە یاری و یەکسانبوون لە حەوت یاری 49 خاڵی کۆکردووەتەوە و پلەی یەکەمی ریزبەندیی خولەکەی گرتووە، یاریی داهاتوویان بەرامبەر یانەی دهۆکە و دەیانەوێت دڵی هاندەرانیان خۆش بکەن.
محەممەد نۆمی، یاریدەدەری راهێنەری یانەی زاخۆ، لەبارەی پلانی داهاتوویان و کەمپەکەیان لە پیرمام، بۆ رووداوی روونکردەوە "سوپاسی دەستەی کارگێڕیی یانەی ئارارات دەکەین بۆ دابینکردنی یاریگەکەیان لەماوەی کەمپی راهێنانمان لێرە. ئامادەکارییەکی باشمان کردووە و دەمانەوێت لە ئاستی خواستی هاندەران بین، کەمپی راهێنانمان بەهۆی وەستانی یارییەکان بوو، دەمانەوێت سێ خاڵی یاریی داهاتوومان وەرگرین و لە ململانێ بەردەوام بین".
هێڵی هێرشبەری یانەی زاخۆ وەرزی ئەمساڵ لە خولی ئەستێرەکانی عێراق هاوشانی هێرشبەرانی یانەی شورتەی رکابەرییان بەتۆمارکردنی 42 گۆڵ بەهێزترینی خولەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ