یەکێتیی تۆپی پێی عێراق بۆ رووداو: یەکێتیی تۆپی پێی ئاسیا سەبارەت بە یاریی شورتە و نەسڕ هەڕەشەی لێنەکردووین

 

هەندێک سەرچاوەی رۆژنامەڤانی عێراقی، باس لەوە دەکەن کە یەکێتیی تۆپی پێی ئاسیا هەڕەشەی ئەوەی کردووە یاریی شورتە و نەسڕ لە چامپیۆنزلیگی ئاسیا بەبێ ئامادەبوونی هاندەران لەسەر یاریگەی مەدینە لە بەغدا بەڕێوەبچێت. یەکێتیی تۆپی پێی عێراق و وەزارەتی وەرزش و لاوانیش هاتوونەتە سەرهێڵ بۆ پاراستنی بارودۆخەکە.

 

دوێنێ فرۆشتنی بلیتەکان، کە یانەی شورتە لێی بەرپرسیاربوو، کێشەی تێکەوت و بلیتەکان کەوتنە بازاڕی رەش و نرخی یەک بلیت گەیشتە 200 هەزار دینار، ئەمەش هاندەرانی تووڕە کرد و ئاژاوەی لێکەوتەوە، گوایە ئەم دۆخە یەکێتیی تۆپی پێی ئاسیای تووڕە کردووە و هەڕەشەی لە یەکێتیی تۆپی پێی عێراق کردووە.

 

یەکێتیی تۆپی پێی عێراق و وەزارەتی وەرزش و لاوان هەرزوو هاتنە سەرهێڵ و دەستێوەردانیان کرد بۆ وەستاندنی ئەو گاڵتەجاڕییە، بەگوێرە میدیای عێراقی.

 

فیراس بەحر ئەلعلوم، ئەندامی یەکێتیی تۆپی پێی عێراق، لە لێدوانێکی تایبەت بە رووداو، ئەو هەواڵەی رەتکردەوە و گوتی "یەکێتیی تۆپی پێی ئاسیا بەهیچ شێوەیەک هەڕەشەی لەو جۆرەی نەکردووە، تەنیا رێنمایی داوەتە یەکێتیی تۆپی پێی عێراق بۆ کارکردن لەپێناو کۆنترۆڵکردنی دۆخەکە و جەختی لەسەر ئەوە کردووەتەوە کە دەبێت سەلامەتی یاریزانان، یاریگە و هاندەرانیش پارێزراو بێت".

 

یەکێتیی تۆپی پێی عێراق و وەزارەتی وەرزش و لاوان، هاتنە سەرهێڵ و لە یەکەم هەنگاودا بۆ کۆنترۆلکردنی دۆخەکە، بەڵێنیان بە هاندەران دا کە شاشەی گەورە لەنێو یاریگەی شەعب دابمەزرێنن و داوایان لە هاندەران کرد نێوبانگی تۆپی پێی عێراق بپارێزێن و کارێکی وا نەکەن کە رووبەڕووی سزای یەکێتیی تۆپی پێی ئاسیا ببنەوە.

 

لە لایەکی دیکەوە، وەزارەتی وەرزش و لاوانی عێراق، بەرپرسیاریەتی ئەو دۆخەی خستە ئەستۆی یانەی شورتە و هەڕەشەی ئەوەی لە یانەکەی بەغدا کرد، کە ئەگەر دۆخەکە ئارام نەکاتەوە، رووبەڕووی سزای تووند دەبێتەوە.

 

لە پێشهاتێکی نوێدا، ئەمڕۆ یانەی نەسڕی سعودی بەفەرمی رایگەیاند کە کریستیانۆ رۆناڵدۆ نایەتە عێراق و بەشداری لە یارییەکەدا ناکات، بەهۆی ئەوەی تووشی پەتایەک بووە.