رووداو دیجیتاڵ
مارسێلۆی ئەفسانەی پێشووی ریال مەدرید باسی لەو یاریزانانە کردووە کە لە کاروانی وەرزشیدا لەگەڵیان یارییکردووە، دەڵێ، رۆناڵدینیۆ کاریگەرترین یاریزان بوو لە هەڵبژاردەی بەرازیل.
مارسێلۆ دوای نزیکەی 20 ساڵ بەردەوامبوون و یارییکردن، بەیەکجاری ماڵئاوایی لە یاریگەکان کرد، پاشئەوەی دوایین وەرزی یارییکردنی خۆی لەگەڵ یانەی فلۆمینێنسی بەرازیلی بەڕێکرد.
ئەو یاریزانە بەرازیلییە، لە لێدوانی رۆژنامەڤانیدا لەپاش وازهێنان دەڵێ، "لەگەڵ زۆر یاریزانی لێهاتوو یارییمکردووە، لە نموونەی رۆناڵدینیۆ لە هەڵبژاردەی بەرازیل، ئەو باشترین بوو".
هەروەها دەڵێ، "بەلای منەوە، مۆدریچ، کرووس و ئیسکۆ ناوازەبوون، بەتایبەت ئیسکۆ، ئەو یاریزانەبوو کە لێسەندنی تۆپ لێی، یەکجار زەحمەت بوو".
هەروەها دەڵێ، "ئەو بەو شێوەیە یارییدەکرد، زۆر ئاڵۆزبوو لە کاتی یارییکردندا، ئاستێکی بێوێنە و خەیاڵیی هەبوو، هەموو کات منی سەرسام دەکرد".
مارسێلۆ لە تەمەنی 36 ساڵیدا بەیەکجاری وازی لە یارییکردن هێنا. ساڵانی یارییکردنی ئەو لەگەڵ ریال مەدریدی ئیسپانی گەیشتە لووتکە، 15 ساڵ لەگەڵ ئەو یانەیە یارییکرد و پێنج نازناوی چامپیۆنزلیگ و شەش نازناوی لالیگای لەگەڵ ئەو یانەیەدا بەدەستهێنا.
لە وەڵامی پرسیارێکدا لەبارەی هەستەکانییەوە پاش وازهێنان، ئەو دەڵێ، "هەموو ئەوەی دەکرێ لە تۆپی پێدا کەسێک بیکات، من کردم، بەبەخت بووم بەوەی یارییم بۆ باشترین یانەی جیهان کرد، هەروەها نازناوی زۆرم لەگەڵیدا بەدەستهێنا".
مارسێلۆ هەروەها دەڵێ، "هەندێک کات هەیە کە دەبێ ئاڵنگاری بکەیت، دەمخواست ئیشی دیکە بکەم، یەکەمیان نزیکبوونەوەی زیاتر لە خێزانەکەم، هەروەها کۆمپانیایەکی کاروباری یاریزانانم هەیە و تیپێکیش لە بەرازیل، دەمەوێ لە داهاتوودا بچمە نێو دونیا هونەر و موزیکەوە".
بەرگریکەرە باڵە بەرازیلییە لێهاتووەکە، لەبارەی ئەگەری بوون بە راهێنەرەوە دەڵێ، "هاوژینەکەم پێیوایە من دەتوانم ببمە راهێنەری منداڵان، بەڵام بۆ ئەوەی ببیتە راهێنەر، دەبێ عەقڵێکی کراوەت هەبێت، هەروەها بزانی چۆن هاوکاریی هەموو یاریزانێک دەکەیت بۆ ئەوەی باش ببێت".
مارسێلۆ لە ماوەی نێوان 2006 تاوەکو 2018 یاریی بۆ هەڵبژاردەی بەرازیل کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ