رووداو دیجیتال
وەزارەتی وەرزش و لاوانی عێراق، لە بڵاوکراوەیەکی فەرمیدا مۆڵەتی دامەزراندنی بە یانەی حەشدی وەرزشی دا، کە سەر بە دەستەی حەشدی شەعبییە.
بەگوێرەی ئەم مۆڵەتپێدانە، یانەی حەشدی شەعبی دەتوانێت بەشداری لە خول و پاڵەوانێتییە وەرزشییەکاندا بکات، لە ناوەوە و دەرەوەی عێراقدا.
وەزارەتی وەرزش و لاوانی عێراق لە بڵاوکراوەکەیدا، دەڵێت "لەسەر بنەمای رەزامەندی بەڕێز وەزیری وەرزش و لاوان لەسەر نووسراومان ژمارە 3287 کە لە 22ـی 10ـی 2020 دەرچووە، مۆڵەتی دامەزراندن بە یانەی حەشدی وەرزشی دەدرێت و لە ماوەی ساڵێکدا کاری پێدەکرێت.
هەروەها لە بڵاوکراوەکەدا هاتووە "یانەکە دەتوانێت بەپێی ئەم مۆڵەتە بەشداری لە پاڵەوانێتییەکانی ناوخۆ و دەرەوەدا بکات، بەپێی ئەو یاسا و رێنماییانەی وەزارەتەکەمان و یەکێتییە وەرزشییەکان کاری پێدەکەن".
لە بڵاوکراوەکەی وەزارەتی وەرزش و لاوانی عێراقدا ئاماژە بەوەشکراوە کە وەزارەتەکەیان هیچ یارمەتییەکی دارایی پێشکەشی یانەکە ناکات، نە ئێستا و نە لە داهاتووشدا، بەو پێیەی سەر بە دامەزراوێکی دیکەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ