رووداو دیجیتاڵ
بەڕێوەبەری راگەیاندنی وەزارەتی گواستنەوەی عێراق رایگەیاند، تاوەکو چوار ساڵی دیکە عێراق 31 فڕۆکەی نوێ بە قەبارە و جۆری جیاواز لە گەورە کۆمپانیاکانی دروستکردنی فڕۆکە وەردەگرێت. دەشڵێت گفتوگۆکان بۆ لابردنی گەمارۆی ئەوروپا لەسەر هێڵی ئاسمانی عێراقی بەردەوامن.
رۆژی یەکشەممە 23-7-2023، مەیسەم سافی، بەڕێوەبەری راگەیاندن و پەیوەندییەکانی وەزارەتی گواستنەوەی عێراق لەبارەی ئەو گرێبەستانەی عێراق بۆ کڕینی فڕۆکە کردوونی، بە تۆڕی میدیایی رووداوی راگەیاند "عێراق تاوەکو ساڵی 2027، 31 فڕۆکە لە جۆرەکانی ئێرباس و ماکس و فڕۆکەی خەونەکان وەردەگرێت".
مەیسەم سافی ئاماژەی بە وردەکاریی کڕینی فڕۆکەکان دا و گوتی "بەپێی گرێبەستەکان لەگەڵ ئەو کۆمپانیایانە بڕیارە عێراق 16 فڕۆکە لە جۆری ئێرباس 220 و 10 فڕۆکە لە جۆری فڕۆکەی خەونەکان (B787) و پێنج فڕۆکە لە جۆری ماکس (B737-8 MAX)ـی کۆمپانیای بۆینگ وەربگرێت."
لەبارەی هەڵگرتنی قەدەخەی ئەوروپا لەسەر هێڵی ئاسمانیی عێراق رایگەیاند "ژمارەیەک لیژنە کارەکانیان بەردەوامە و بە ئاگاداری و سەرپەرشتیی وەزیری گواستنەوە، هەوڵەکان چڕکراونەتەوە بۆ هەڵگرتنی قەدەخەی ئەوروپا لەسەر هێڵی فڕۆکەوانیی عێراقی."
عێراق، ئێستا خاوەنی 28 فڕۆکەیە، جگە لە 7 فڕۆکە لە کەشتیگەلە کۆنەکەی، تاوەکو ساڵی 2027 چاوەڕوان دەکرێت ژمارەی فڕۆکەکانی بگاتە 66 فڕۆکەی مەدەنی.
سەرلەبەیانی رۆژی شه‌ممە 12-12-2015 به‌شی فڕۆكه‌وانیی مه‌ده‌نیی یه‌كێتیی ئه‌وروپا بڵاوی کردەوە هێڵی ئاسمانیی عێراقییه خراوەتە نێو لیستی ره‌شی فڕۆكه‌وانیی ئەوروپا، به‌هۆی پابه‌ندنه‌بوونی به مه‌رجه‌كانی سه‌لامه‌تیی فڕۆكه‌وانیی و سه‌رنشینه‌كانی.
مەیسەم سافی، پێیوایە کڕینی ئەو فڕۆکانە، کاریگەریی باشی لەسەر بەرزکردنەوەی ئاستی خزمەتگوزارییەکان و نوێکردنەوەیان دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ