رووداو دیجیتاڵ
حیزبوڵڵای لوبنان دوو تەقینەوە خۆكوژییەكەی گۆڕەپانی تەیەرانی شاری بەغدای سەركۆنە كرد و دەڵێت، وەڵامدانەوەی تەقینەوەكە بە رەتكردنەوەی داگیركاریی ئەمریكا دەبێت.
لە راگەیێندراوێكدا حیزبوڵڵای لوبنان دەڵێت "دوای ماوەیەك ئارامی و سەقامگیری، دووبارە گەڕانەوەی تەقینەوەكان جێگای گومانە، بەتایبەتی دوای بەرزبوونەوەی داواكاریی میللـی و فەرمی بۆ كێشانەوەی هێزی داگیركاری ئەمریكی لە عێراق، كە لە بەرامبەردا واشنتن دەستەی حەشدی شەعبی و سەركردەكانی خستنە نێو لیستی سزاكانیەوە".
حیزبوڵڵای لوبنان ئاماژەی بەوەش كردووە "ئەو تاوانە دڕندەیە بە هۆشیاریی یەكێتیی عێراقییەكان و سووربوونیان لەسەر ئازادی، سەربەخۆیی، رەتكردنەوەی داگیركاریی ئەمریكی و درێژەدان بە هەوڵەكانیان بۆ راوەدوونانی گرووپە تیرۆریستییەكان لە وڵات دەبێت".
پێش نیوەڕۆی رۆژی پێنجشەممە 21ی کانوونی دووەمی 2021 دوو خۆكوژ لە گۆڕەپانی تەیەران لە ناوەڕاستی شاری بەغدا خۆیان تەقاندەوە و بەهۆیەوە دەیان هاووڵاتیی سڤیل كوژران و برینداربوون.
بەگوێرەی دوایین ئاماری وەزارەتی تەندروستیی عێراق، 32 كەس كوژراون و 110 كەسی دیكەش برینداربوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ