رووداو دیجیتاڵ
دوو کەس لە پارێزگاى زیقار دەستگیرکران کە 300 مەتر زەوی کشتوکاڵییان بە جۆرێک رووەکى هۆشبەر چاندووە بۆ ئەوەى بە ئالوودەبووانى بفرۆشن.
ئەو دوو کەسە لەلایەن یەکەیەکى هەواڵگری و ئاسایشى زیقار دەستگیرکراون.
24ى تشرینى دووەم، وەزارەتى بەرگریى عێراق لە راگەیێندراوێکدا گوتی، ئەو دوو کەسە 10 کیلۆگرام لەو رووەکە هۆشبەرەیان پێ گیراوە و لەکاتى لێکۆڵینەوە دانیان بەوەدا ناوەکە رووبەرێک زەوى 300 مەترییان بەو رووەکە چاندووە.
ئەو رووەکە هۆشبەرەى دوو کەسەکە چاندوویانە لە جۆرى داتۆرایە و شەوان گوڵەکەى دەکرێتەوە.
وەزارەتى بەرگریى عێراق ئاماژەى بەوەداوە کە توانیویانە ئەو زەوییە کشتوکاڵییە بدۆزنەوە کە ئەو جۆرە رووەکەى تێدا چێندراوە.
ئەو دوو کەسە بە گوێرەى مادەى 28ى یاساى مادە هۆشبەرەکان و کارتێکەرەکە دەروونییەکان رەوانەى لایەنى پەیوەندار کراون بۆ ئەوەى رێوشوێنى یاسایی بەرامبەریان بگیرێتەبەر کە یەکێک لە بڕگەکانى تایبەتە بە فرۆشتنى رووەکى هۆشبەر و سزاکەى بەندکردنى قورس و پێبژاردنە لەنێوان 5 بۆ 10 ملیۆن دینار.
لە شەش مانگى یەکەمی ئەم ساڵدا بەڕێوەبەرایەتیى بنبڕکردنى مادەى هۆشبەر و کارتێکەرە دەروونییەکان، دەستى گرتووە بەسەر یەک تۆن و 822 کیلۆ و 740 گرام مادەى هۆشبەردا و حەوت هەزار و 705 تۆمەتبارى مادەى هۆشبەریش دەستگیرکراون کە 1435 یان بازرگانى مادەى هۆشبەر بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ