رووداو دیجیتاڵ
گوتەبێژی وەزارەتی ناوخۆی عێراق دەڵێت، هێزەکانی ناوخۆ لە بازگەیەکی پارێزگای کەرکووک دەستیان بەسەر 5 ملیار لیرەی سووریدا گرتووە.
ئەمڕۆ هەینی 10-01-2025 عەمید میقداد میری، گوتەبێژی وەزارەتی ناوخۆی عێراق بە تۆڕی میدیایی رووداوی راگەیاند، "لە بازگەی تەرکەلانی کەرکووک، هێزەکانمان توانییان دەستبەسەر بڕی 5 ملیار لیرەی سووریدا بگرن، کە لەنێو بارهەڵگرێکدا شاردرابووەوە."
گوتەبێژی وەزارەتی ناوخۆی عێراق گوتیشی، "شۆفێرەکە و کەسێکی دیکەش کە هاوەڵی بوو، دەستگیر کراون و لێکۆڵینەوەیان لەگەڵ دەکرێت. هێشتا روون نییە ئەو پارەیەیان بۆ کوێ و چ مەبەستێک بردووە، بەڵام دیارە کە تەنیا جێبەجێکارن نەوەک خاوەن پارە."
عەمید میقداد میری ئاماژەی بەوەش کرد، "بارهەڵگرەکە لە دەروازەی قائیمەوە هاتووەتە نێو عێراق و لێکۆڵینەوە لە چۆنێتیی هاتنەناوەوەشی دەکەین، دواتر بۆ رای گشتیی ئاشکرا دەکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ