لە کێشەی نێوان هۆزەکانی عێراق زۆر جار چەکی بێ مۆڵەت بەکاردەهێندرێت

 

لیوا ناسر عەلی نووری، بەڕێوەبەری کاروباری هۆزەکان لە وەزارەتی ناوخۆ دەڵێت، "ساڵی 2022 لە رێگەی دەستەی راوێژکاران و تیمە تایبەتەکانمانەوە توانیمان 2403 کێشە و ناکۆکیی نێوان هۆزەکان چارەسەربکەین. بۆ ئەم مەبەستە لیژنە و دەستەی تایبەتیی راوێژکاران و پیاوماقوڵانمان لە سەرجەم پارێزگاکان دامەزراندووە و ئەوانیش لە زۆربەی کێشەکاندا رۆڵی نێوەندگیرییان گێڕاوە. ئەوان رۆڵی زۆر باشیان گێڕاوە لە هۆشیارکردنەوەی خەڵک".  

 

وەزارەتی ناوخۆ زنجیرەیەک بڕیار و رێکاری تووندی لەبارەی پێدانی مۆڵەتی چەک هەڵگرتن گرتووەتەبەر. ئەم رێکارانە کاریگەری راستەوخۆیان لە کەمکردنەوەی چەک هەبووە. جگە لەوەش، بەردەوام هەڵمەتی ئەمنی بۆ دەستگرتن بەسەر چەکە بێ مۆڵەتەکان ئەنجام دەدات. 

 

لیوا خالید مەحنا، گوتەبێژی وەزارەتی ناوخۆ باسی لەوە کرد، "پار هەزاران چەکی سووک و مامناوەند و کەرەستەی دیکە دەستیان بەسەرداگیرا. ئەم سیاسەتەی وەزارەتی ناوخۆ نەک تەنیا بەردەوام دەبێت، بگرە لە قۆناخەکانی داهاتووشدا فراوانتر دەبێت. وەزارەتی ناوخۆ ویستێکی بەهێزی هەیە لە کۆنترۆڵکردنی چەک و هێشتنەوەی لەژێر دەستی دەوڵەت. چەندین رێکاری تووندمان گرتووەتەبەر بەتایبەتی تووندکردنی رێکاری پێدانی مۆڵەتی چەک هەڵگرتن." 

 

بەر لە راگەیاندنی ئامارە فەرمییەکان، تۆڕی میدیایی رووداو لە سەرچاوەی ئەمنییەوە زانیاری دەستکەوت بەوەی وەزارەتی ناوخۆی عێراق لەماوەی ساڵێکدا دەستی بەسەر زیاتر لە 45 هەزار چەکی جیاوازدا گرتووە.