لۆگۆی دەستەی دەستپاکیی عێراق
رووداو دیجیتاڵ
دەستەى دەستپاکیى عێراق داوا لە کۆمیسیۆنى باڵاى سەربەخۆى هەڵبژاردنەکانى عێراق دەکات ناوى سەرۆکى پارت و هاوپەیمانێتییەکان و دەستەی دامەزرێنەرانیان پێ بدات بۆ ئەوەى وردبینى لە موڵک و ماڵیاندا بکات.
عیماد جەمیل، سەرۆکى تیمى رۆژنامەڤانیی کۆمیسیۆنى باڵاى سەربەخۆى هەڵبژاردنەکانى عێراق ئەمڕۆ (دووشەممە، 3-7-2023) بە تۆڕى میدیایی رووداوى راگەیاند، دەستەى دەستپاکى عێراق نووسراوێکى ئاراستە کردوون و داواى ناوى سەرۆکى هاوپەیمانێتى و پارتەکان و ئەندامانى دەستەى دامەزرێنەری کردووە بۆ ئەوەى بزانن موڵک و ماڵیان چەندە.
عیماد جەمیل گوتیشى، "هەر پارت و هاوپەیمانێتییەکى نوێ ناوى خۆى لە کۆمیسیۆن تۆمار بکات، زانیارى لەبارەى سەرۆک و ئەندامانى دەستەى دامەزرێنەرییەوە دەدەینە دەستەى دەستپاکى".
پێشتر لە 30ـی حوزەیران، دەستەى دەستپاکى عێراق لە راگەیێندراوێکدا گوتی، کاردانەوەى سەرۆکى پارت و ئەندامانى دەستە دامەزرێنەرانیان بۆ ئاشکراکردنى موڵک و ماڵیان زۆر کەمە و لەگەڵ کۆمیسیۆنى هەڵبژاردنەکانى عێراق بۆ ئەو مەبەستە هاوئاهەنگى دەکەن.
بەگوێرەى مادەى 16ـی یاساى دەستەى دەستپاکى عێراق، دەبێت سەرۆککۆمار، سەرۆکوەزیران، ئەندامانى پەرلەمان، پلە باڵاکانى دیکە، سەرۆکى پارت و رێکخراوە سیاسییەکان، ساڵانە فۆرمى ئاشکراکردنى موڵک و ماڵیان پڕبکەنەوە و بیدەنە دەستەى دەستپاکى تاوەکو لێکۆڵینەوە لە ئەگەری زیادبوونى قەبارەکەى بکات.
سەرۆکى تیمى رۆژنامەڤانیی کۆمیسیۆنى باڵاى سەربەخۆى هەڵبژاردنەکانى عێراق گوتى، "لەدواى رادەستکردنى ناوى سەرۆکى هاوپەیمانیێتى و پارت و ئەندامانى دەستەى دامەزرێنەریان بە دەستەى دەستپاکى، ئەو دەستەیە داوایان لێدەکات موڵک و ماڵیان ئاشکرا بکەن".
تائێستا 77 پارتى سیاسی و 41 هاوپەیمانیێتى لە کۆمیسیۆنى باڵاى سەربەخۆى هەڵبژاردنەکانى عێراق تۆمارکراون، لەکاتێکدا لە یەکى تەمموزەوە دەرگاى تۆمارکردنى هاوپەیمانیێتى نوێ کراوەتەوە بۆ هەڵبژاردنى ئەنجوومەنى پارێزگاکان، کە بڕیارە لە 28ـی کانوونى یەکەمى ئەمساڵ بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ