رووداو دیجیتاڵ
سەرۆکوەزیرانی ئیسرائیل رایگەیاند، جارێکی دیکە رێگە نادەن دوژمنەکانیان لە سووریا و لوبنان بەهێز ببنەوە. راشیگەیاند دەستیان بۆ هاوپەیمانە درووزییەکان و هاوڕێ کوردەکانیان لە ناوچەکەدا درێژە.
رۆژی دووشەممە، بنیامین نەتەنیاهوو، سەرۆکوەزیرانی ئیسرائیل لە پەرلەمانی وڵاتەکەی، ناسراو بە کنێست گوتارێکی پێشکەش کرد.
بنیامین نەتەنیاهوو رایگەیاند، خۆیان بۆ قۆناخی داهاتوو ئامادە دەکەن و درێژە بە شەڕی حەوت بەرە دەدەن تاوەکو ئامانجەکانیان بەدیدێنن.
نەتەنیاهوو گوتی: "ناوەستین تاوەکو دڵنیا دەبینەوە کە چیدی حەماس نابێتە هەڕەشە لەسەر ئیسرائیل."
شەڕی حەماس و ئیسرائیل لە حەوتی ئۆکتۆبەری 2023 دەستیپێکرد، ئەمەش دوای ئەوەی بزووتنەوە فەلەستینییەکە ئۆپەراسیۆنێکی لە ناکاوی بەناوی (تۆفانی ئەقسا) بۆ سەر ئۆردووگا جوونشینەکانی ئیسرائیل کرد، لە بەرامبەر ئیسرائیل بە ئۆپەراسیۆنی (شمشێری ئاسنین) وەڵامی هێرشەکەی حەماسی دایەوە.
سەرۆکوەزیرانی ئیسرائیل سەبارەت بە بارمتەکان گوتی: "هەندێک کەس لەو باوەڕەدا بوون، تەنانەت ناتوانین یەک بارمتەش بگەڕێنینەوە، بەڵام تائێستا 196 بارمتەمان گەڕاندووەتەوە. سەرجەم بارمتەکان دەگەڕێنینەوە."
بەگوتەی سەرۆکوەزیرانی ئیسرائیل، حەماس لە قۆناخی یەکەمی ئاگربەستەکە لە نۆڤێمبەری 2023 ئامادە بووە تەنیا 50 بارمتە ئازاد بکات، بەڵام ئەو پێداگیری کردووە، 80 بارمتە ئازاد بکەن.
بنیامین نەتەنیاهوو هێرشی تووندی کردە سەر ئۆپۆزیسیۆنی وڵاتەکەی و گوتی: "ئێوە کەمپەینێکی سیاسی و درۆینەتان بەڕێوە برد لەسەر حیسابی خێزانی رفێنراوەکان وەک ئەوەی حکومەت رێگر بێت لە رێککەوتن. ئێمە هەرچەند بارمتەی زیاتر بگەڕێنینەوە، ئێوە هێرشی زیاترمان دەکەنە سەر."
لە دوایین ئاگربەستی نێوان حەماس و ئیسرائیل لە یەکی ئەم مانگە کۆتاییهات، 25 بارمتەی ئیسرائیل ئازاد کران، بەڵام سەرۆکوەزیرانی ئیسرائیل دەڵێت: "حەماس بڕیاری دابوو تەنیا 12 بارمتە ئازاد بکات، زۆر کەس لێرە هاواری دەکرد کە بە هەر نرخێک بێت رازی بین، بەڵام خۆم و تیمەکەم رازی نەبووین و رێککەوتنێکی باشترمان کرد."
ئێستا 59 بارمتەی ئیسرائیلی لای حەماس ماون، بە گوتەی سەرۆکوەزیرانی ئیسرائیل 24 لەو بارمتانە زیندوون و 35ـەکەی دیکەش کوژراون.
'غەززەییەکان بەرتیلیان داوە بۆ رۆیشتن'
دۆناڵد ترەمپ، سەرۆکی ئەمریکا داوای کردووە غەززە چۆڵ بکرێت و دانیشتووانەکەی بگوازرێنەوە بۆ وڵاتانی دەوروبەری کەرتەکە، بەڵام پێشنیازەکەی ترەمپ رووبەڕووی رەخنەی تووندی زۆربەی وڵاتان بووەتەوە.
سەرۆکوەزیرانی ئیسرائیل پشتگیریی خۆی بۆ پێشنیازەکەی ترەمپ دووپاتکردەوە و گوتی: "کاتی ئەوە هاتووە بژارەیەکی راستەقینە بدرێتە دانیشتووانی غەززە، کاتی ئەوە هاتووە رێگەیان پێبدرێت بڕۆن."
بنیامین نەتەنیاهوو هەر لە بارەی چۆڵکردنی کەرتەکە گوتی: "هەزاران کەس لە غەززەوە دەرچوون. بەرتیلیان دا بۆ دەرچوون. دەوڵەمەندەکان رۆیشتن، بەڵام هەژارەکان لە دواوە مانەوە، لە ژێر دەسەڵاتی حەماسدا کە بۆ مەبەستی خۆی بەکاریان دەهێنێت."
'کورد هاوڕێمانن'
سەرۆکوەزیرانی ئیسرائیل دەڵێت ئەوان تەنیا لە دژی حەماس شەڕ ناکەن و گوتی: "رێکخراوە تیرۆریستییەکان ناتوانن چیدی لە سنوورەکانماندا بمێننەوە. لە لوبنان چۆکمان بە حیزبوڵڵا دا، سوپای ئەسەدمان لەنێوبرد. رێگە نادەین دوژمنەکانمان لە لوبنان و سورویا جارێکی دیکە بەهێز ببنەوە. هاوکات، دەستمان درێژە بۆ هاوپەیمانە دروزییەکانمان و هاوڕێ کوردەکانمان لە ناوچەکەدا."
لە سووریای نوێدا کورد و درووزەکان زۆرترین چاویان لەسەرە، بەرپرسانی ئیسرائیل تائێستا چەند جارێک باسی ئەو دوو پێکهاتەیان کردووە.
رۆژی یەکشەممە، 2ی ئاداری 2025، جەدعون سار، وەزیری دەرەوەی ئیسرائیل رایگەیاند: "ئیسرائیل پەیوەندییەکی باشی لەگەڵ دروزەکان هەیە. ئێمەش لە ئیسرائیل کەمینەی دروزەکانمان هەن. گرنگە کە دەسەڵاتدارانی نوێی دیمەشق رێز لە مافی کەمینەکان، لەوانە مافی دروزەکان بگرن."
ئەو وەزیرە ئیسرائیلییە لەبارەی حکومەتی سووریاش گوتبووی، "ئەو حکومەتە هەڵبژێردراوی گەلی سووریا نییە. تەنیا ژمارەیەک خەڵک و گرووپی جیهادین کە لە رابردوودا کۆنترۆڵی ئیدلبیان کردبوو و بەزەبری هێزیش چەند ناوچەیەکی دیکە و دیمەشقیشیان گرتووە، بەڵام ئەوە بەو مانایە نایەت کە دووژمنکاری لە دژی کەمینەکان بکەن، ئینجا چ دروزەکان، یان کوردەکان یانیش عەلەوییەکان بن."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ