هەڵەیەک روویدا! دووبارە هەوڵبدە
گرووپەکە شەوێک لە ئەشکەوتەکە مانەوە
رووداو دیجیتاڵ
گرووپێک کچ و کوڕی گەنجی دانیشتووی هەولێر و سلێمانی، چوونە ئەشکەوتی سناوە لە شارەدێی سکتانی کۆیە کە 70 کیلۆمەتر لە هەولێرەوە دوورە. هەندێکیان یەکەم جارە بەشداریی کەمپینگ دەکەن. شەوێک لە ئەشکەوتەکە مانەوە و هاڵۆوینیان لەوێ کرد.
دوای کاژێر و نیوێک، 45 گەنجەکە گەیشتنە ئەشکەوتی سناوە و دەستیان بە هەڵدانی چادرەکانیان کرد. ئەشکەوتەکەیان بە کولەکە خانمی و میوزیک و چەند هێمایەکی دیکەی هاڵۆوین رازاندەوە. ئەو شەوەشیان بە چەندین چالاکیی ترسناک بۆ ترساندنی یەکدی بەڕێکرد.
یەکێک لەو چالاکییانە، چوونە بۆ شوێنێکی چۆڵ کە نیو کاژێر لە ئەشکەوتەکە دوورە، دەبێت بە رێگەی سەخت و تاریک تێپەڕن بۆ ئەوەی بگەن بەوێ، لە رێگە گاڵتە دەکەن و هەندێکیان دەنگی ترسناک دەردەکەن. بەشێک لە گەنجان چیرۆکی جنۆکە و رۆحەکانیان بۆ یەکدی گێڕایەوە.
مەحبووبە عەزیز لەگەڵ هاوژینەکەی بەیەکەوە لە گەشتەکەدا بەشدار بوون و بە رووداوی گوت، "زۆر هیوایەتم گەشتە، گەشت و سەفەر یەکێکە لە هیوایەتەکانم، بەتایبەت ئەو گەشتانەی سەرکێشی و ترسی تێدایە هەر زۆر تایبەتترە بەلای منەوە."
مامۆستا مەهاباد بە تەمەنترین ئەندامی گرووپەکەیە، تەمەنی 62 ساڵە و لەگەڵ 2 کچی لە گەشتەکەدا بەشدار بوو. مەهاباد فەرەج دەڵێت، "تێکەڵبوون لەگەڵ سرووشت و خەڵکی دیکە، هەست دەکەم پێویستە، ئەمەش ناڵێم لەبەر خاتری هاڵۆوین هاتووین، بەڵام کە گەشتەکە هەبوو بڕیارماندا، بۆشم بکرێت هەموو هەفتەیەک بەپێی کات، هەموو کاتێک حەزم لێیەتی."
ئالان باڵدوینی بەریتانی، تاکە بیانیی بەشداربووی گەشتەکە بوو، ئەو تەمەنی 58 ساڵە و 40 وڵاتی جیهان گەڕاوە. ئالان باڵدوین کە 10 رۆژە لە هەولێرە، بە رووداوی گوت، "هاڵۆوینەکە باشبوو، بەڵام بە چەند کەسێکی گرووپەکەشم گوت کە هاڵوین بۆ کوردەکان شتێکی نوێیە و ئەوەی رێکخراوە دەتوانرا کەمێک ترسناکتربێت لەوەی ئێستا."
هاڵۆوین بۆنەیەکی کۆمەڵایەتییە، لە 31ی ئۆکتۆبەری هەموو ساڵێک لە زۆربەی وڵاتانی جیهان بەتایبەت ئەمریکا و ئەوروپا، خەڵک جلوبەرگی سەیر و ترسناک لەبەر دەکەن و ماڵ و شوێنی کاریان بە دیزانی ترسناک دەڕازێننەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ