هەڵەیەک روویدا! دووبارە هەوڵبدە
رووداو دیجیتاڵ
دوای نزیکەی هەشت ساڵ، بارەگای پارتی گەلی تورکمان لە کەرکووک کرایەوە. سەرۆکی پارتەکە دەڵێت: "دەمانەوێت لەنێو لایەنگرانمان درێژە بە کاری سیاسی بدەین."
رۆژی چوارشەممە، دووی نیسانی 2025، عیرفان کەرکووکی، سەرۆکی پارتی گەلی تورکمان بە تۆڕی میدیایی رووداوی راگەیاند: "لەنێو شاری کەرکووک بارەگامان کردەوە تاوەکو خزمەت بە نەتەوەی خۆمان لە کەرکووک بکەین، بە هاوئاهەنگی لەگەڵ برا کورد، عەرەب و ئاشوورییەکان؛ تاوەکو بتوانین ئاشتی و پێکەوەژیان بەرقەرار بکەین."
سەرۆکی پارتی گەلی تورکمان دەڵێت: "ئەمڕۆ بۆ ئێمە دوو جەژنە، چونکە ئیدی دەتوانین خزمەت بە ئێستا و داهاتووی تورکمانان لە نێو پارێزگەی کەرکووک بکەین. داواکاری تورکمانەکان و خەڵکی ئەو شوێنانەی خزمەتگوزارییان نییە، دەگەیێنین و داوا دەکەین خزمەتگوزارییان بۆ دابین بکرێت".
هەشت ساڵە بارەگای سەرەکی پارتی گەلی تورکمان لە کەرکووک لای ئەو پارتە نییە. عیرفان کەرکووکی گوتی: "چەندین ساڵە سکاڵای یاساییمان لە دادگە تۆمارکردووە تاوەکو بارەگاکان بگەڕێندرێنەوە. بەدواداچوون دەکەین تاوەکو مافەکانمان بۆ بگەڕێندرێنەوە."
لەبارەی بەشداریکردن لە هەڵبژاردنی داهاتووی پەرلەمانی عێراق، عیرفان کەرکووکی گوتی: "لە داهاتوودا بڕیار دەدەین."
16ـی ئۆکتۆبەری 2017 سوپای عێراق و حەشدی شەعبی هێرشیان کردە سەر کەرکووک و شارەکەیان کۆنترۆڵ کرد. دوای ئەو رووداوە، بەشێکی هێزە سیاسییەکان لەوێ نەمان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ