رووداو دیجیتاڵ
جەلال مەلەکشا شاعیری نێوداری کوردستان و خەڵکی رۆژهەڵاتی کوردستان لە سنە کۆچی دواییکرد.
شاعیر و نووسەر سمین چایچی، بە تۆڕی میدیایی رووداوی راگەیاند، ئێوارەی ئەمڕۆ جەلال مەلەکشای شاعیر لە تەمەنی 69 ساڵیدا بە جەڵتەی دڵ کۆچی دوایی کرد.
لە ساڵی 1951 لە گوندی مەلەکشا سەر بە شاری سنە لەدایکبووە. هەر لەوێ خوێندوویەتی و لە سەرەتاوە بە فارسی شیعر و پەخشان و چیرۆکی نووسیووە.
مەلەکشا لەبەر ھێز و پێزی لە نووسیندا بەبێ ئەوەی کتێبی چاپکراوەی ببێ، بووەتە ئەندامی "کانوونی نووسەرانی ئێران". لەو کاتەدا زۆرێک لە شاعیر و نووسەرانی گەورەی ئێرانی ئەندامی کانوون بوون، وەک ئەخەوانی سالس، ئەحمەدی شاملوو، جەلالی ئالی ئەحمەد، مەحموود ئیعتمادزادە و هۆشەنگ گوڵشیری.
دوای ساڵی 1979 جەلالی مەلەکشا بە کوردی بەرهەمە ئەدەبییەکانی نووسیوون. بۆ ماوەی 15 ساڵ وەکو نووسەر و رۆژنامەڤان دەبێتە ئەندامی گۆڤاری سروە و پەرە بە زمان و ئەدەبی کوردی دەدات.
ماوەیەک لە شاری هەولێر لە گۆڤاری پرشنگ سەرقاڵی کاری رۆژنامەڤانی بووە، لە شاری سنەش لەگەڵ چەند هەفتەنامە و گۆڤارێکدا کاری کردووە.
نموونەیەک لە شیعرەکانی مەلەکشا:
ئاخۆ دەبێ
ئەو رۆژە بێ
کاوەی کوڕم
جانتای سەفەر کاتە شانی
دەڵاڵانی بەر گا‌راژی
شاری سنە هاوار بکەن:
"سلێمانی ... سلێمانی!"
----------------------
من کە سوتاوی فیراقم ئیتر ناوم بۆ چییە
خەزنەداری گەنجی عیشقی تۆم دراوم بۆ چییە
کەم بە شمێری برۆ قەسدی دڵی زارم بکە
من شەهیدم تیخی تیژی تازە سواوم بۆ چییە
من بە بەد ناوی لە دنیادا بەناو بانگم، بەڵام
یادو ناوی تۆم لە دڵ بێ، بانگ و ناوم بۆ چییە
وەک پڵنگی جەنگەڵی عیشقم بە سەربەستی دەژیم
زوڵف و چاوی تۆم هەبێ، زنجیر و داوم بۆ چییە
ئەم جیهانە چۆڵ و هۆڵ و من غەریبێکم نەناس
نیشتیمانی خۆم دەوێ، دنیای گڵاوم بۆ چییە
من لە تەنیایی گەلێک تەنیا ترم لەم شارە دا
ماڵی غەم هەر ئاوەدان بێ، ژاوە ژاوم بو چییە
بۆ فەرامۆشی بەرەو مەیخانە ڕاکێشم مەکەن
مەست و کەیلی ساغەری عیشقم، شەراوم بۆ چییە
من کە پەیمانم لەگەڵ ڕۆحی هەتاوا بەستوە
نازو غەمزەی وردە تیشکی ناو بە ناوم بۆ چییە
من موریدی حەزرەتی پەروانەم و غەرقی گڕم
نوری روخسارم دەوێ، شەمعی شکاوم بۆ چییە..؟!
پێشتر رووداو چاوپێکەوتنێکی لەگەڵ جەلال مەلەکشا ئەنجامدابوو و گوتبووی، شیعر ژیانی منی بە قوڕدا کرد.
مەلەکشا ئەم شیعرەی بۆ کوردانی ئێزدی گوتووە:
مەلەکشا ئەم شیعرەی بۆ کوردانی ئێزدی گوتووە:
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ