بەشێکی فەرمانبەرانی دهۆک 15 ساڵە چاوەڕێی وەرگرتنی پارچە زەوی دەکەن

 

دوای دوو ساڵ پێشمەرگایەتی و 19 ساڵ کاری پۆلیسی، مستەفا ساڵی 2018 خۆی خانەنشین کرد، لەپێناو پەیداکردنی بژێوییەکی باشتریش بۆ منداڵەکانی، دەستی بە کاری ئازاد کرد.

 

ساڵی 2011 ناوی لەو لیستەدا بوو کە رەزامەندیی لەسەر درا بۆ ئەوەی پارچە زەویی پێبدرێت، چونکە هەموو مەرجەکان دەیگرتەوە، بەڵام 14 ساڵ تێپەڕیوە و هێشتا وەرینەگرتووە.

 

مستەفا ئەحمەد، کاسبکار دەڵێت "ناومان لە لیستی پێدانی زەویدا هەیە، هیوادارین پێمانی بدەن، چونکە هاوڕێکانمان ئەوانەی لەدوای ئێمەش بوونە پۆلیس زەوییان پێدرا. ئەوان ناویان چووە شێخان و دەوروبەری و زەوییان بەسەردا دابەشکرا، بەڵام ئێمە سەر بە دهۆکین و دوایانخستین. لە ساڵی 2011ـەوە لە پۆلیس بووم تاوەکو 2018، بەڵام مووچە کێشە بوو بۆیە خۆم خانەنشین کرد".

 

بەشێکی پارچە زەوییەکانی دهۆک، ئەوانەی زیاتر لە 10 ساڵە رەزامەندییان لەسەر دراوە، دەکەونە سنووری قەزای سێمێل و ژمارەیان هەزار و 792 پارچە زەوییە، کە بۆ پێشمەرگە، زیندانییانی سیاسی و فەرمانبەران تەرخانکراون.

 

موحسین عەبدولکەریم بەڕێوەبەری شارەوانیی سێمێل بە رووداوی گوت "پێش ئێستا ئێمە 432 ناوی زیاندی سیاسی و فەرمانبەران هەبوو، کە لە سێمێل پارچە زەوییان پێبدرێت، لە کەرتی سەرشۆر نزیکەی 1360 پارچە زەوی بڕیاریان لەسەر دراوە دابەش بکرێن، ئەمەش کاری لەسەر دەکرێت تاوەکو لە نزیکترین کاتدا دابەشبکرێن."

 

بەپێی ئاماری فەرمی کە دەست رووداو کەوتوون، ئەو فەرمانبەرانەی رەزامەندیی وەرگرتنی پارچە زەوییان هەیە، لە سنووری پارێزگەی دهۆک لە ساڵانی نێوان 2009 بۆ 2013 ژمارەیان نزیکەی 21 هەزار فەرمانبەرە، پێنج هەزاریان لە سنووری ئیدارەی سەربەخۆی زاخۆ و 16 هەزارەکەی دیکەش سەر بە دهۆک و قەزاکانین. لەگەڵ دەستپێکردنی پرۆسەی دابەشکردنی پارچە زەوی، سەرەتا بۆ ئەوان دەبێت پاشان ئەوانەی لەم ماوەیەدا فۆرمیان پڕکردووەتەوە.