حەلبووسی: سەردەمی دەستوەردانی دەرەکی لە پێکهێنانی حکومەتی عێراق بەسەرچوو

 

کەمێک پێش ئێستا نێچیرڤان بارزانی، جێگری سەرۆکی پارتی گەیشتە نەجەف بە مەبەستی کۆبوونەوە لەگەڵ موقتەدا سەدر؛ هاوکات هەردوو سەرکردەی سوننە محەممەد حەلبووسی، سەرۆکی پەرلەمانی عێراق و خەمیس خەنجەر، سەرۆکی هاوپەیمانیی سەروەریی سوننەکان چوونە نەجەف بە مەبەستی کۆبوونەوە لەگەڵ رێبەری رەوتی سەدر.

 

محەممەد حەلبووسی لەگەڵ گەیشتنی بۆ شاری نەجەف لە هەژماری خۆی لە تویتەر رایگەیاند: "سەردەمی دەستوەردانی دەرەکی لە پێکهێنانی حکومەتەکانی عێراقدا بەسەرچوو؛ ئەمڕۆش چیاکان و بیابانەکانی عێراق بەرەو نەجەفی پیرۆز دەڕۆن بۆ دانوستاندن سەبارەت بە حکومەتێکی عێراقی بەتەواوەتی نیشتمانی بێت، نە رۆژهەڵاتی بێت نە رۆژئاوایی".

 

سەردانەکەی نێچیرڤان بارزانی و حەلبووسی بۆ نەجەف لەسەر پێشنیازی سەرۆک بارزانییە، چونکە لە پەیامێکدا سەرۆک بارزانی رایگەیاند: "لەپێناو چارەسەری گیروگرفتەكان و رەخساندنی كەشێكی گونجاو و باش بۆ پرۆسەی سیاسیی عێراق، دەستپێشخەرییەكی سیاسیم خستووەتەڕوو. لە چوارچێوەی ئەم دەستپێشخەرییەدا پێشنیازم كردووە بەڕێزان نێچیرڤان بارزانی و محەممەد حەلبووسی سەردانی سەماحەتی سەید موقتەدا سەدر بكەن و لەسەر چۆنێتی بەردەوامبوونی پرۆسەی سیاسی و نەهێشتنی كۆسپ و گرفتەكان راوێژ بكەن".

 

ئەم پێشهاتە هاوکاتە لەگەڵ سووربوونی موقتەدا سەدر، رێبەری رەوتی سەر لەسەر پێکهێنانی حکومەتی زۆرینەی نیشتمانی لە عێراق لە هەموو لایەنەکان بەدەر لە هاوپەیمانیی دەوڵەتی یاسا و نووری مالیکی، سەرۆکی هاوپەیمانییەکە.