هەڵەیەک روویدا! دووبارە هەوڵبدە
رووداو دیجیتاڵ
لەدوای کۆبووەنەوەیان لەگەڵ یەکێتیی هاوردە و هەناردەکارانی هەولێر، سەرۆکی ژووری بازرگانیی قەزوین دەڵێت: "ئامانجی سەرەکیمان بازاڕەکانی هەرێمی کوردستانە و یەک لەسەر سێی هەناردەکانمان بۆ هەرێمی کوردستان بووە."
رۆژی دووشەممە، 29-07-2024 شاندێکی بازرگانیی قەزوین سەردانی یەکێتیی هاوردە و هەناردەکارانی لقی هەولێریان کرد و لە کۆبوونەوەکەیاندا باسیان لە ئامانجە هاوبەشەکانی هەردوولا کرد.
سەرۆکی یەکێتیی هاوردە و هەناردەکانی قەزوین دەڵێت: "لە ماوەی 15 ساڵی رابردوو 50% بەرهەمەکانیان هەناردەی عێراق کردووە و 70%ـی لە رێگەی هەرێمی کوردستانەوە هەناردە کراوە و بازاڕەکانی هەرێمی کوردستان ئامانجی سەرەکی ئێمەیە."
مێهدی عەبدیان، سەرۆکی یەکێتیی هاوردە و هەناردەکارانی قەزوین بە رووداوی راگەیاند، عێراق و هەرێمی کوردستان، "دۆست و دراوسێ ئێمەن و من خۆم نزیکەی 21 ساڵ لێرە چالاکی دەکەم. پارێزگای قەزوین یەک لە سەر سێی هەناردەکردنەکانی بۆ هەرێمی کوردستان بووە. یەکێک لە بازاڕە گەورەکانە بۆ ئێمە و دەمانەوێ گەورەتری بکەین و پشکی زیاترمان هەبێت."
عەبدیان گوتیشی: "ئێمە سێ هەزار و 740 یەکەی پیشەسازیمان هەیە لە کەرتی تایبەت و دەوڵەتیش، لە کەرتی کشتوکاڵ هەزار و 51 یەکەی بەرهەمهێنانمان هەیە و هەروەها لە بوارە جیاوازەکان، لە بواری بیناسازی هەموو جۆرە بەرهەمێکمان هەیە، لە 50% بەرهەمهێنانی کاشی و سیرامیکی ئێران لە شاری ئێمەیە. ئێمە هەروەها لەسەر کاستی ئێران دووەم بەرهەمهێنەری مێوژ و زەیتوونین."
"دوو مانگ پێش ئێستا لە رێگەی ژووری بازرگانیی قەزوین نووسینگەیەکمان لە هەولێر کردەوە و نوێنەرمان هەیە لێرە تا بتوانین پەیوەندیی باشتر لەگەڵ ژووری بازرگانیی هەولێر و یەکێتیی هاوردە و هەناردەکارانی هەولێر دروست بکەین، لێرەش داوام لە بەرپرسان کرد و دیسان داوا دەکەم سەردانی قەزوین بکەن، شاری ئێمە شارێکی جوانە و زۆرترین ئاسەواری مێژوویمان هەیە." سەرۆکی یەکێتیی هاوردە و هەناردەکارانی قەزوین وا دەڵێت.
لەبارەی پەیوەندییەکانی ئەو دوو شارەوە لە بواری بازرگانیدا، سەرۆکی لقی هەولێری یەکێتیی هاوردە و هەناردەکاران بە رووداوی راگەیاند، یەکێک لە ئامانجەکانی سەردانیکردنی سەرۆکی یەکێتیی هاوردە و هەناردەکارانی پارێزگای قەزوین کە هاوکات سەرۆکی ژووری بازرگانیشە، بۆ ئەوەیە "بەشداری لە پێشانگەی نێودەوڵەتیی هەولێر بکەن، کە نزیکەی 50 کۆمپانیای خاوەن کارگەن و دەیانەوێ زیاتر بەرهەمەکانی خۆیان بە هەولێر بناسێنن."
رەسول حاجی عومەر ئاماژەی بەوەشکرد: "لە کۆبوونەوەکەمان لەگەڵ شاندی بازرگانیی قەزوین باسمان لە چۆنیەتی دامەزراندنی کارگە کردووە، هاوشێوەی ئەو کارگانەی کە لە پارێزگای قەزوین هەیە."
هەرێمی کوردستان و ئێران، نزیکەی 650 کیلۆمەتر سنووری هاوبەشیان هەیە. 7 دەروازەی سنووریی لەنێوانیان هەیە و قەبارەی بازرگانییەکەی بە ترانزێتەوە زیاتر لە 7 ملیار دۆلارە لە ساڵێکدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ