ڤیلادیمیر پووتین و نێچیرڤان بارزانی و دۆناڵد ترەمپ
رووداو دیجیتاڵ
نووسەر و چالاکڤانێکی بەنێوبانگی ئەمریکی-بەریتانی لە بەرنامەی کەناڵێکی ئەمریکا باسی سەرۆکی هەرێمی کوردستان دەکات و دەڵێت: "هاوبەشی چارەسەری کێشەکان نێچیرڤان بارزانییە." هەروەها دەڵێت: "رووسیا و ئەمریکا لە هەرێمی کوردستان گفتوگۆ بکەن و کۆببنەوە."
قەنتە ئەحمەد؛ پزیشک، نووسەر و چالاکڤانی بەناوبانگی ئەمریکی- بەریتانی لە هەڤپەیڤینێک لەگەڵ میدیای ئەمریکی، باسی سەرۆکی هەرێمی کوردستانی کرد.
قەنتە ئەحمەد لەکاتی بەشداریکردن لە بەرنامەیەکی کەناڵی نیوز نەیشنی ئەمریکا، باسی کێشەکانی ناوچەکە، گرژییەکانی نێوان ئێران و ئەمریکا و جەنگی رووسیای کرد. ئەو گوتی: "بە سەرۆک ترەمپ و ئیدارەکەی دەڵێم، ئەوان پێویستە لە یەکەم رۆژەوە چارەسەری ژیرانەیان پێبێت. هاوبەشێکی ئەو چارەسەرەش نێچیرڤان بارزانی، سەرۆکی هەرێمی کوردستانە، کە پێشتر لەگەڵ تورکیا، سووریا و ئێران هەوڵی گەیشتن بە چارەسەری داوە، نەوەک فەرمانکردن. دەکرێت ئەمە کۆتایی بە کێشەکە بهێنێت."
خانمە چالاکڤانەکە لە بەشێکی دیکەی هەڤپەیڤینەکە باسی کێشەکانی نێوان رووسیا و ئەمریکای کرد. دکتۆر قەنتە گوتی: "پێموایە سەرۆک ترەمپ دەتوانێت یەکەمین هەنگاوی ئاشتییانە بنێت، کە بریتییە لە کۆبوونەوە لە دەوری مێزێک و گفتوگۆکردن لەگەڵ یەکدی. زیاتر لە دوو ساڵە هیچ گفتوگۆیەک لە نێوان رووسیا و ئەمریکا رووینەداوە."
قەنتە ئەحمەد لەبارەی شوێنی کۆبوونەوەکە گوتی: "پێموایە ئەم کۆبوونەوەیەی نێوان ئەمریکا و رووسیا لە هەرێمی کوردستان بکرێت، کە پەیوەندی لەگەڵ رووسیا و نەوتی رووسیا هەیە. [هەرێمی کوردستان] ئەمریکا، رۆژهەڵاتی نێوەڕاست و رووسیا کۆدەکاتەوە بۆ ئەوەی ئەم تەنگژەیە هێور بکاتەوە."
پێشتر ئەو دکتۆرە ئەمریکی-بەریتانییە چەند جارێکی دیکە باسی هەرێمی کوردستان و سەرۆکەکەی کردووە.
رۆژی 26-06-2024 لە هەڤپەیڤینێک لەگەڵ کەناڵی فۆکس نیوزی ئەمریکی، کە لەترەمپ نزیکە گوتی: "لەوانەیە سەرۆک نێچیرڤان بارزانی، سەرۆکی کوردستان، یەکێک لە تەنیا کەسایەتییە بێلایەنەکان بێت لە هەموو ناوچەکەدا کە پەیوەندییەکی باشی لەگەڵ ئێران، پەیوەندییەکی باشی لەگەڵ عێراق، پەیوەندییەکی باشی لەگەڵ تورکیا و پەیوەندییەکی زۆر باشی لەگەڵ ویلایەتە یەکگرتووەکان هەیە و هیچ بەرژەوەندییەکیشی لەم شەڕەدا نییە. دەکرێت سەرۆک نێچیرڤان ببێتە دانوستاندنکاری سەرەکی و بەدیهێنەری ئاشتی،" لەو شەڕەی ناوچەکەی گرتووەتەوە.
دکتۆر قەنتە لە لەندەن لەدایکبووە، باوانی پاکستانین. لە ساڵی 1992 بۆ خوێندن چووەتە ئەمریکا و دواتر بۆ ماوەی ساڵێک چووەتە سعودیە. پاشان، بۆ خوێندن و توێژینەوە چووەتە ئیسرائیل و لە ساڵی 2015ـش وەڵاتینامەی ئەمریکای وەرگرت، ئێستا لە نیویۆرک دەژی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ