رووداو دیجیتاڵ
سکرتاریەتی یەکێتیی مامۆستایان دەڵێت، ئەو دەنگۆیانە رەتدەکەنەوە کە گوایە یەکێتییەکە "هەژماری من" رەتدەکاتەوە و رایگەیاند، "یەکێتییەکە لە چەندین پارت و لایەن پێكهاتووە، هەریەكەیان تەعبیر لە بۆچوونی خۆی دەكات."
رۆژی شەممە، 27-04-2024، مەکتەبی سکرتاریەتی یەکێتیی مامۆستایانی کوردستان روونکردنەوەیەکی لەبارەی "هەژماری من" بڵاوکردەوە و رایگەیاند ئەو دەنگۆیانە رەتدەکەنەوە كە هەندێ پەیج و ماڵپەر بەناوی یەكێتیی مامۆستایان بڵاویانكردووەتەوە گوایە یەكێتیی مامۆستایان 'هەژماری من' رەتدەكاتەوە.
لە روونکردنەوەکەدا هاتووە، "بەداخەوە، ماوەیەكە هەندێ پەیج و دەزگای میدیایی هەواڵ و زانیاری بەناوی یەكێتیی مامۆستایانی كوردستان بڵاودەكەنەوە، كە هیچ پەیوەندیی بە یەكێتیی مامۆستایانەوە نییە.
سەرۆکی یەکێتی مامۆستایان لە پشکی پارتییە و جێگرەکەشی یەکێتییە، هەروەها ئەندامانی سکرتاریەت لە چوار پارتی، چوار یەکێتی، دوو گۆڕان، یەک یەکگرتوو، یەک کۆمەڵ، یەک تورکمان و یەک ئەندامی کریستیان پێکدێت.
لە بەشێکی دیکەی روونکردنەوەکەدا جەخت کراوەتەوە لەوەی ''یەکێتییەکە لە چەندین پارت و لایەن پێكهاتووە، هەریەكە و تەعبیر لە بۆچوونی خۆی دەكات، هەروەها هەر ئەندامێک لە یەكێتیی مامۆستایان ئەگەر لێدوانێک یان كۆمێنێتک بكات، تەعبیر لە رای یەكێتیی مامۆستایان ناكات."
ئەحمەد گەرمیانی، سەرۆکی یەکێتیی مامۆستایان بە رووداوی گوت: بەشێک لە ئەندامانی سکرتاریەت روونکردنەوەیان لەبارەی "هەژماری من" دابوو، گوایە یەکێتیی مامۆستایان رەتیدەکاتەوە. "ئەوە رای خۆیانە و بە هیچ شێوەیەک گوزارشت لە رای یەکێتییەکە بە گشتی ناکات، چونکە یەکێتییەکە لە چەند لایەنێک پێکدێت و هەرکەسێک باس لە رای حیزبیی خۆی دەکات."
لەبارەی هەڵوێستی یەکێتیی مامۆستایان لەسەر پڕۆژەی'هەژماری من'، سەرۆکی یەکێتییەکە دەڵێت، "نە رەتیدەکەینەوە و نە هیچ رایەکمان لەبارەی باش و خراپییەوە داوە، چونکە سکرتاریەت هیچ کۆبوونەوەیەکی نەکردووە تاوەکو رایەکی گشتی لەبارەی ئەو پڕۆژەیە بڵاوبکاتەوە."
بە گوتەی ئەحمەد گەرمیانی: هێشتا دیار نییە کەی سکرتاریەت کۆدەبێتەوە "سەرەتا دەبێت کۆنگرە بکەین. مانگی کانوونی یەکەمی 2023 دیاریکرا، بەڵام برادەرانی سلێمانی پێیان باش نەبوو لەو کاتەدا بکرێت و تائیستا کاتی نوێ دیارینەکراوە."
یەکێتیی مامۆستایانی کوردستان تاوەکو ئێستا 12 کۆنگرەی کردووە. لە ساڵی 1962 یەکەم کۆنگرەی بەست و ئێستا خاوەنی 81 هەزار ئەندامە و 13 ساڵە کۆنگرەی نەکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ