رووداو دیجیتاڵ
گوتەبێژی وەزارەتی کارەبای حکومەتی هەرێمی کوردستان، هۆکاری کەمبوونەوەی کاژێرەکانی کارەبای نیشتمانیی بۆ پرۆسەی چاککردنەوە لە ویستگەکانی کارەبا گەڕاندەوە و رایگەیاند، لە سبەیەوە دۆخەکە ئاسایی دەبێتەوە.
ئومێد ئەحمەد، گوتەبێژی وەزارەتی کارەبای حکومەتی هەرێمی کوردستان رۆژی پێنجشەممە، 25-04-2024، بە تۆڕی میدیایی رووداوی راگەیاند، بەشێک لە چاککردنەوە (سیانە) لە یەکەکان بە بەرنامەیە و بەشێکیان بەهۆی گرفتە، ئەمجارە هەردوو جۆر بوو.
وەزارەتی کارەبای حکومەتی هەرێمی کوردستان لەبارەی کەمبوونەوەی کاژێرەکانی کارەبا دەڵێت، چاککردنەوە لە یەکەکانی بەرهەمهێنانی کارەبا کراوە و سبەی تەواو دەبێت.
وەزارەتی کارەبا لە یەکەکانی بەرهەمهێنانی کارەبا لە خورمەڵە و قەزای خەبات دەستی بە (چاککردنەوە) کردووە. گوتەبێژی وەزارەتی کارەبا دەڵێت، لە خورمەڵە بە بەرنامە بووە، بەڵام لە وێستگەی قەزای خەبات گرفتێک هاتووەتە پێشەوە و پێویست بووە بکرێت.
بە گوتەی ئومێد ئەحمەد، چاوەڕوانن تاوەکو سبەی هەینی 400 مێگاوات کارەبا بگەڕێتەوە و دۆخی کارەبا ئاسایی دەبێتەوە.
وەزارەتی کارەبا ویستوویەتی پێشتر دەست بە چاککردنەوەی یەکەکانی بەرهەمهێنانی کارەبا بکات، بەڵام ئومێد ئەحمەد دەڵێت، بەهۆی مانگی رەمەزان و جەژنەوە کارەکانیان راگرتووە و ئێستا دوای ئەوەی پلەی گەرما هەندێک دابەزی، کارەکانیان دەستیپێکردووەتەوە.
گوتەبێژی وەزارەتی کارەبای هەرێمی کوردستان گوتیشی، پێش چاککردنەوەی لە یەکەکان 18 کاژێر کارەبا بە هاووڵاتییان دراوە، بەڵام بەهۆی سیانەوە چوار بۆ پێنج کاژێر کارەبا کەمبووەتەوە.
لەبارەی کاژێرەکانی کارەبا لە سبەی هەینییەوە، ئومێد ئەحمەد گوتی: "خواست نزیکەی چوار هەزار مێگاواتە و چاوەڕوانن دوای تەواوبوونی چاککردنەوە، بەرهەمهێنان ببێتە نزیکەی 3500 مێگاوات، ئەگەر تاوەکو ئەوکات خواست بەوشێوەیە بمێنێتەوە دەتوانین لەسەر ئاستی هەرێمی کوردستان وەکو پێشتر نزیکەی 18 کاژێر کارەبا بە هاووڵاتییان بدەین."
لە هەرێمی کوردستان بەرزترین ئاستی خواست بۆ بەکارهێنانی کارەبا لە وەرزی زستان و هاوینە، کە هاونیشتمانیان بۆ گەرمی و ساردی کارەبای زیاتر بەکاردەهێنن. لەو وەرزانەدا خواست لەسەر بەکارهێنانی کارەبا دەگاتە نزیکەی 7 هەزار مێگاوات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ