هەڵەیەک روویدا! دووبارە هەوڵبدە
دیمەنێکی نێو پێشانگەی کتێب لە هەولێر
رووداو - هەولێر
کتێبخانە و دەزگاکان چاپ بە چەندین ناونیشانی کتێبی جیاواز بەشدارن لە پێشانگەی نێودەوڵەتیی کتێب. دەزگای ئەلمەدا وەشانخانەیەکی عەرەبییە و بە 1600 ناونیشان کە 48یان نوێن، بەشدارییان کردووە.
سابیر ئەحمەد لە دەزگای مەدا دەڵێت، "لە رۆژی یەکەمیان سێ کتێب پڕفرۆشترین بووە، یەکەمیان نووسینی فەخری کەریمە، کە خۆی خاوەنی مەدایە. دووەم ئەوەیە کە کاک مەسعودیش هەڵیبژارد، سێیەم کتێبیش هی ئەحمەد چەلەبییە کە باسی بنەماڵەی چەلەبیەکان دەکات."
لە دوو وەشانخانەی کوردییش بە هەمان شێوە، کتێبی جیاواز خواستیان لەسەر بوو. خەڵات عەلی لە دەزگای فاو دەڵێت، "کتێبی (هاواری من)ی یاشار کەمال، کە محەممەد عیزەدین وەرگێڕانی بۆ کردووە. کتێبی (دوو ساڵ لە کوردستان)ی ویلیام رابێرت های، (بیرەوەرییەکانم) لە نووسینی موسا عەنتەر."
دانا لە وەشانخانەی سەردەم گوتی، "کۆمەڵێک کتێب هەن لە کتێبە تازەکانمان، بۆیە ناتوانم بڵێم کامیان زیاتر فرۆشی هەبووە."
لە وەشانخانەی تەفسیریش دوو کتێب زۆرترین فرۆشیان هەبووە. موخلیس یونس لە وەشانخانەی تەفسیر دەڵێت، "یەکێکیان (مانای وشەکانی قورئان بە کوردی) و دووەمینی (موسڵمانان چیان پێشکێشی جیهان کرد)."
لە رۆژی جیهانیی کتێب، زۆرترین خوێندکار و قوتابی بەشداریی پێشانگاکەیان کرد. عیسا فاتیح قادر، خوێنەر دەڵێت، "پیرۆزبایی لە هەموو خوێندکاران دەکەم و هیوادارم گەنجەکان زیاتر روو لە خوێندن بکەن، چونکە بەداخەوە ئەمڕۆ گەنجەکانمان زۆر بە دونیای سۆشیاڵ میدیاوە سەرقاڵن."
عەبدوڵڵا رزگار، خوێنەر باسی لەوە کرد، "کتێبیکم کڕیوە لەسەر مەلا مستەفا بارزانی، چونکە دەمویست لەسەر ژیانی بزانم کە چۆن بووە بە سەرۆکی کوردان." خوێنەرێکی دیکە بەناوی زینیاد ئیبراهیم گوتی، "سەردانی زۆر ناوەندم کرد و لە ناوەندی ئاوێر کتێبی دکتۆر سەردار هەردیم هەڵبژارد."
16یەمین پێشانگای نێودەوڵەتیی کتێب لە هەولێر تاوەکو 27ی مانگ بەردەوام دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ