کوردستان
پێشەوا هەورامانی، گوتەبێژی فراکسیۆنی پارتی لە پەرلەمانی کوردستان و د. ئارام محەممەد، وەزیری خوێندنی باڵا و توێژینەوەی زانستی
رووداو دیجیتاڵ
وەزیری خوێندنی باڵا و توێژینەوەی زانستی رایگەیاند، کەرتی گشتیی زانکۆ حکومییەکان "بارگرانییەکی یەکجار زۆریان خستووەتە سەر حکومەت". گوتەبێژی فراکسیۆنی پارتی لە پەرلەمانی کوردستانیش دەڵێت، "ئەم قسەیە واتە کوڕی فەقیر و هەژار تۆ بارێکی گرانیت".
د. ئارام محەممەد قادر، وەزیری خوێندنی باڵا و توێژینەوەی زانستی لەمیانی بەشداریکردنی لە کۆنفرانسێکی پەروەردەیی لە زانکۆی ئەمریکیی کوردستان لە دهۆک رایگەیاند، "دوو گرفتی زۆر سەرەکی هەیە"، ئەوانیش سیستەمی "وەرگرتن/قبووڵی مەرکەزی" کە ئەم سیستەمە پێوەری تێکڕا نمرەی پۆلی 12 ئەژمار دەکات، کە "رێچکەی خوێندن، باکگراوند و توانا راستەقینەکانی داهێنانی خوێندکار و قوتابی لەبەرچاو ناگرێت و ئەم سیستەمە پێویستە بگۆڕدرێت، تاوەکو نەیگۆڕین ناتوانین دڵخۆشبین بەوەی هیچ ریفۆرمێک لە کوردستاندا لە سێکتەری خوێندنی باڵا بتوانێت جێگە بگرێت".
بە گوتەی وەزیری خوێندنی باڵا و توێژینەوەی زانستی "بۆشاییەکی ئێجگار گەورە هەیە لەنێوان ئەو کارەمەییانەی کە لەناو پەروەردە دروستدەکرێن، ئۆتۆماتیکی دێنە نێو وەزارەتی خوێندنی باڵاوە و دەچنە نێو زانکۆکان"، دەشڵێت، نابێت ترس هەبێت لە فراوانکردنی خوێندنی "پیشەیی و تایبەت"، پێشیوایە، " کەرتی گشتیی زانکۆ حکومییەکان بارگرانییەکی یەکجار زۆریان خستووەتە سەر حکومەت. لە دنیای مۆدێرندا دەبێت ئەمانە سەربەخۆ بن و لە جێگەی دیکە بن".
لە وەڵامی ئەو قسەیەی وەزیری خوێندنی باڵا، پێشەوا هەورامانی، گوتەبێژی فراکسیۆنی پارتی دیموکراتی کوردستان لە پەرلەمانی کوردستان دەڵێت، "ئەم قسەیە واتە کوڕی فەقیر و هەژار تۆ بارێکی گرانیت، ئەی ئەو کەسەی شەو و رۆژ سەرقاڵی دەرس و نمرە بوویت تۆ بارێکی گرانیت، ئەی پارەدار تۆ بارێکی سووک و شیرینیت و باشت کرد بە پەنجا و شەستەوە خۆت لە پۆلی شەش رزگارکرد و ئاییندە بۆتۆیە".
گوتەبێژی فراکسیۆنی پارتی ئاماژەی بەوەش کردووە، "زۆر بە داخەوەم و زۆر نیگەران بووم ئەم قسەیەم خوێندەوە، ئەم وڵاتە بەرەو ئەوە دەچێت فەقیر تێیدا غەریبە و پارە سەروەر و گەورەی هەموو شتێک بێت".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ