رووداو دیجیتاڵ
راوێژکاری سەرۆکوەزیرانی هەرێمی کوردستان بۆ کاروباری وزە رایدەگەیێنێت، هێشتا گفتوگۆکانی هەرێمی کوردستان و بەغدا لەبارەی رەشنووسی یاسای نەوت و گازی عێراقەوە لە سەرەتاکانیدایە و بڕیارە لە ماوەکانی داهاتوودا تاوتوێی وردەکارییەکان بکەن. دەشڵێت، "هەرێمی کوردستان لەگەڵ رەشنووسی یاسای ساڵی 2007ـە و بە گونجاوی دەزانێت، بەڵام بەغدا رەشنووسی ساڵی 2011 بە باشتر دەزانێت."
رۆژی پێنجشەممە 16-02-2023 د. بێوار خنسی، راوێژکاری سەرۆکوەزیرانی هەرێمی کوردستان بۆ کاروباری وزە بە تۆڕی میدیایی رووداوی گوت، "بڕیارە بەمنزیکانە شاندێکی هەرێمی کوردستان سەردانی بەغدا بکاتەوە و بابەتی یاسای نەوت و گاز یەکێکە لە تەوەرە سەرەکییەکانی گفتوگۆ، ئەوەی تاوەکو ئێستا باسکراوە هێڵە گشتییەکانن، بەڵام هەردوولا نەچوونەتە نێو وردەکاریی رەشنووسەکە چۆن بێت و چی تێدابێت و ماف و ئەرکەکان چۆن دیاری بکرێن."
د. بێوار خنسی روونیشیکردەوە، "لە داهاتوودا و لە رێگەی چەند لیژنەیەکەوە رەشنووسی یاسای نەوت و گاز ئامادە دەکرێت، لیژنەی یاسایی و تەکنیکی و هونەری، بەڵام هێشتا نەچووینەتە نێو ئەو وردەکارییانەوە."
راوێژکاری سەرۆکوەزیران لەبارەی بۆچوونەکانی هەرێمی کوردستان و داواکارییەکانی لە یاسای نەوت و گاز، کە کێشەیەکە تەمەنی نزیک بە 20 ساڵ دەبێت، گوتی، "لەگەڵ ئەوەدایە مافی هەرێمی کوردستان و پارێزگا بەرهەمهێنەرەکان پێشێل نەکرێت و مافیان بەسەر سامانە سرووشتییەکانەوە هەبێت، بۆیە هەرێمی کوردستان و شاندەکەشی پێیانوایە باشترین رەشنووسی یاسای نەوت و گاز ئەوەیە لە ساڵی 2007 نووسرایەوە و دواتر پەکخرا، چونکە لەوێ تاڕادەیەکی زۆر مافی هەموو پارێزگا و هەرێمەکان دەستەبەر کراوە و هەموو شتێک ناوەندی نییە."
بەڵام ئەو راوێژکارەی سەرۆکوەزیرانی هەرێمی کوردستان دەشڵێت، "پێدەچێت وەزارەتی نەوتی عێراق پێی باش بێت پشت بە رەشنووسی یاسای نەوت و گازی ساڵی 2011 ببەسترێت کە بەلای هەرێمی کوردستانەوە پەسند نییە."
لەگەڵ ئەوەشدا د. بێوار خنسی باسی لەوەش کرد، هەر پرۆژەیاسایەک چ کۆن بێت یان نوێ، پێویستی بە رێککەوتن و هاوئاهەنگی هەیە و هەردوولا ئارەزووی گەیشتن بە رێککەوتنیان هەیە. دەشڵێت، "ئەگەر هەریەک لەو سێ پرۆژەیاسایەی پێشتریش پشتی پێ ببەسترێت، دەبێت دەستکاری بکرێت."
یەکێک لە دیارترین کێشەکانی نەوت و گاز لە عێراقدا، بەتایبەت لەدوای ساڵی 2003وە، نەبوونی یاسای نەوت و گازە. لە 2007ـەوە سێ جار پرۆژەیاسای نەوت و گاز لە عێراق رەوانەی پەرلەمان کراوە، بەڵام ناکۆکیی نێوان لایەنە سیاسییەکان رێگر بووە لە تێپەڕاندنی، نەبوونی ئەم یاسایە وایکرد هەرێمی کوردستان خۆی یاسایەک بۆ نەوت و گازەکەی دەربکات.
بەپێی مادەی 112ی دەستوور، بیرە نەوتەکانی ھەرێمی کوردستان، ئەوانەی پێش ساڵی 2005ن بەڕێوەبردنیان لەدەست حکومەتی ھەرێمی کوردستان دەبێت و ھەر بیرە نەوتێکیش دوای پەسندکردنی دەستوور بێت، بە ھاوبەشی بەڕێوەدەبرێت.
رۆژی 15ی شوباتی 2022، دادگەی باڵای فیدراڵیی عێراق بڕیارێکی لەبارەی دۆسیەی نەوت و گازی هەرێمی کوردستان دەرکرد و بە "نادەستووری" ناساندی، داواشی لە هەرێمی کوردستان کرد داهاتی نەوتی بەرهەمهێندراو رادەستی حکومەتی فیدراڵیی عێراق بکات؛ هەرێمی کوردستانیش کە لەو کاتەوە کەوتووەتە ژێر چەندین گوشاری جیاوە، بڕیارەکەی رەتکردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ