لە هۆڵەندا خانمێکی کورد خەڵاتێکی لە بواری سیستمی زیرەکدا بەدەستهێنا

 

 

هاژە خان میوانی دیاسپۆرا بوو و رایگەیاند، خەڵاتەکە لەسەر بنەمای باشترین لێکۆڵینەوە بوو لە بواری زیرەکیی دەستکرد و گوتیشی، "لێکۆڵینەوەکەم لەبارەی ئاپێک بوو لە بەدخۆراکیی منداڵان، توانیم ئاپەکە بەرهەمبهێنم و دەتوانرێت لەڕێگەی وێنەیەکەوە، هەروەها چەند زانیارییەک لەبارەی منداڵەکەوە بدرێت بە ئاپەکە و بەدخۆراکی لە منداڵدا ئاشکرا بکرێت."

 

ئەو خانمە روونیشی کردەوە، نزیکەی 200 ملیۆن منداڵ لە جیهاندا بەدەست بەدخۆراکییەوە دەناڵێنن و ئامانجی ئەو ئەوەیە ئەو ژمارەیە لەڕێگەی زیرەکیی دەستکردەوە کەم ببێتەوە.

 

هاژە محەممەد خان، کە بڕوانامەی ئەندازیاریی کارەبای لە کوردستان بەدەستهێناوە، بەڵام لە هۆڵەندا ماستەری لە زیرەکیی دەستکرد بەدەستهێناوە و ئێستاش خوێندکاری دکتۆرایە، دەڵێت، "جگە لەوەی لەڕێگەی ئاپەکەوە دەتوانرێت بەدخۆراکیی منداڵ ئاشکرا بکرێت، ئاپەکە چارەسەری منداڵی بەدخۆراکیش دەخاتەڕوو."

 

هاژە محەممەد خان ئاشکرای کرد، تاوەکو ئێستا ئاپەکە بەگەڕنەخراوە، واتە نەخراوەتە دەست بەرژەوەندیی گشتی، بەڵکو ئێستا لەلایەن تیمەکانی لێکۆڵینەوە و زانستی کاری لەسەر دەکرێت."

 

هاژە محەممەد خان هیوای خواست بە کارکردنی لە زیرەکیی دەستکرددا بتوانێت رێژەی بەدخۆراکی لە جیهاندا کەمبکاتەوە.