رووداو دیجیتاڵ
لە رۆژانی 15 تاوەکو 17ـی ئەم مانگە کۆڕبەندی ئاشتی و ئاسایشی رۆژهەڵاتی نێوەڕاست لە زانکۆی ئەمریکیی کوردستان لە دهۆک بەڕێوەدەچێت و هەر یەکە لە سەرۆککۆماری عێراق، سەرۆکی هەرێمی کوردستان و سەرۆکوەزیرانی هەرێمی کوردستان بەشدارن.
ئێوارەی ئەمڕۆ یەکشەممە، 13-11-2022 کۆڕبەندەکە بڵاویان کردەوە کە لەتیف رەشید، سەرۆککۆماری تازە هەڵبژێردراوی عێراق بەشدار دەبێت و یەکێک دەبێت لە قسەکەرەکان.
کۆڕبەندەکەی ئەمساڵ سێیەم کۆڕبەندی زانکۆی ئەمریکیی کوردستان لە دهۆک دەبێت و تێیدا باس لە هەڕەشە نوێیەکان و واقیعی رۆژهەڵاتی نێوەڕاست دەکرێت.
هەر یەکە لە نێچیرڤان بارزانی، سەرۆکی هەرێمی کوردستان، مەسرور بارزانی، سەرۆکوەزیرانی هەرێمی کوردستان، د. فوئاد حوسێن، وەزیری دەرەوەی عێراق و چەندین کەسایەتیی دیکەی پسپۆڕ لەبواری وزە و ئاسایش لە کۆڕبەندەکەدا گفتوگۆ لەبارەی "رێگەکانی چارەسەرکردنی کێشە سیاسی، ئابووری و ئەمنییەکانی رۆژهەڵاتی نێوەڕاست دەکەن."
کۆڕبەندەکە دەڵێت، جەختیان لەسەر هەوڵەکانە لە رۆژهەڵاتی نێوەڕاست بۆ خۆبنیادنانەوە دوای بەهاری عەرەبی، شەڕە بەردەوامەکان، شەڕی داعش و گۆڕانی کەشوهەوا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ