بەهۆی تەقینەوەی مینەوە دوو کەس لە رواندز بریندار بوون

 

بەیار باڵەکی، گوتەبێژی بەرگریی شارستانیی سۆران بە تۆڕی میدیایی رووداوی راگەیاند، ئێوارەی ئەمڕۆ هەینی ژمارەیەک شاخەوان دەچنە چیای گۆرنۆکی بێخاڵ لە سنووری قەزای رواندز. دەشڵێت، یەکێک لەوان "لە پیادە رێ" لادەدات و بەهۆیەوە مینێک لەژێر پێی دەتەقێت، لە ئەنجامدا دوو لە شاخەوانەکان بریندار بوون.

 

گوتەبێژی بەرگریی شارستانیی سۆران راشیگەیاند، یەکێک لەوانەی بریندار بووە ناوی ( م، م، ه)ـە و لەدایکبووى 1998یە، بارى تەندروستى جێگیرە. 

 

بەگوتەی بەرگریی شارستانیی سۆران، بریندارەکەی دیکە لەدایکبووى 1991ـە، خێزاندارە و دانیشتووى رواندزە، بەهۆی ئەوەی قاچی بەر مینەکە کەوتووە، قاچێکى لە دەستداوە.