رووداو دیجیتاڵ
لە پارێزگای رووهای باکووری کوردستان، ئەمڕۆ هەینی نرخی گۆشت زیادکرا، کیلۆیەک گۆشتی سوور گەیشتە 375 لیرە کە بە نرخی ئەمڕۆ دەکاتە 12 دۆلار و 46 سەنت.
لە تورکیا و باکووری کوردستان قەیرانی ئابووری قووڵتر دەبێتەوە و رۆژ بە رۆژ نرخی کاڵا و خۆراک زیاد دەبێت.
ژووری بازرگانان و پیشەوەرانی رووها، لەسەر داوای گۆشتفرۆشان و بەهۆی زۆری تێچووەوە، نرخی گۆشتی قیمە، گۆشتی بەرخ و گۆشتی مانگای بەرزکردەوە.
بەپێی ئەو نرخە نوێیانە، کیلۆیەک گۆشتی قیمەی بەرخ بە 320 لیرە، کە دەکاتە 10 دۆلار و 64 سەنت و کیلۆیەک گۆشتی نەرمەی بەرخ بە 340 لیرە، کە دەکاتە 11 دۆلار و 30 سەنت، کیلۆیەک گۆشتی نەرمەی گا بۆ چێشتلێنان بە 375 لیرە دەکاتە 12 دۆلار و 46 سەنت و کیلۆیەک گۆشتی گا بە 320 لیرە دەفرۆشرێت، کە دەکاتە 10 دۆلار و 64 سەنت.
لە شاری رووها رۆژی چوارشەممە 10ـی کانوونی دووەمی 2024، نرخی نان یەک لیرە بەرزکرایەوە.
بەپێی بڕیاری ژووری نانەواکانی رووها، نرخی 170 گرام نان و 200 گرام سەموون و 150 گرام نانی کراوە بە حەوت لیرە دەفرۆشرێت کە بە نرخی ئەمڕۆ دەکاتە 23 سەنت. پێشتر نان و سەموون بە شەش لیرە دەفرۆشرا، کە دەکاتە 20 سەنت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ