رووداو دیجیتاڵ
دوای پێنج رۆژ لە دیارنەمانی تەرمی مێردمنداڵێکی تەمەن 14 ساڵ لە بنەسڵاوەی هەولێر دۆزرایەوە، مامێکی ئەو مێردمنداڵە بە رووداوی راگەیاند "چەقۆیان لە ملی داوە و دواتر خنکاندوویانە."
خەلەف سەعدوڵڵا ناوی ئەو کوڕەیە کە تەرمەکەی دۆزراوەتەوە و خەڵکی قەزای شنگالە، بەڵام ماوەی پێنج ساڵە لە ناحیەی کۆڕێی سنووری قەزای شەقڵاوە دادەنیشن. خەلەف برایەکی دیکەی هەیە لەگەڵ حەوت خوشک.
لە رۆژی 05-11-2020 خەلەف لە ماڵ چووەتەدەرەوە و کەسوکارەکەیشی بەدوایدا دەگەڕان. نەواف تەها، مامی خەلەف بە تۆڕی میدیایی رووداوی راگەیاند "رۆژی دووشەممە پۆلیسی بنەسڵاوە ئاگادارییان کردینەوە لە بوونی تەرمێک و دوای ئەوەی سەردانمان کردن، دەرکەوت کە کوڕەکەی ئێمەیە و بە دڕندانەترین شێوە کوژراوە."
نەواف تەها، مامی خەلەف دەشڵێت، ئەو کوڕە و ماڵباتەکەیشی کێشەیان لەگەڵ کەس نەبووە و ناشزانن کێ کوشتویەتی و داواش لە لایەنە پەیوەندیدارەکان دەکات بە زووترین کات بکوژرانی ئەو کوڕە بدۆزنەوە.
بەگوتەی مامی خەلەف، لە دادپزیشکی پشکنینیان بۆکردووە و دەرکەوتووە کە تەرمەکەی چەند چەقۆیەک بە ملییەوە بووە و دواتر شوێنەواری خنکانیشی پێوە دیاربووە.
هۆگر عەزیز، گوتەبێژی پۆلیسی هەولێر بە رووداوی راگەیاند " لەسەر کوشتنی ئەو مێردمنداڵە کەسێکمان دەستگیرکردووە کە گومان دەکرێت بکەری رووداوەکە بێت، بەڵام جارێ لە لێکۆڵینەوەداین و دواتر رایدەگەیێنین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ