ساتی سووتانی سووتانی تەنکەرەکان.
رووداو دیجیتاڵ
دوو تانکەر لەسەر رێگەی پێنجوێن پێکیاندادا و بەهۆیەوە جگە لە خۆیان، تانکەرێکی دیکەیش گڕی گرت؛ شاهێدحاڵەکان دەڵێن، نەیانتوانیوە شۆفێری یەکێک لە تانکەرەکان رزگار بکەن و گیانی لەدەستداوە.
رووداوەکە شەوی پێنجشەممە، 09-01-2025، لەسەر رێگەی پێنجوێن روویداوە. سازگار سەڵاح، پەیامنێری تۆڕی میدیایی رووداو لە شوێنی رووداوەکە رایگەیاند، ''دوای زیاتر لە هەشت کاژێر لە سووتانی تانکەرەکان و کۆنترۆڵکردنی، هێشتا پاشماوەی ئاگرەکە ماوە''.
بەپێی زانیارییە سەرەتاییەکان، یەکێک لە شۆفێری تانکەرەکان کە تەمەنی لەنێوان 20 بۆ 21 ساڵ بووە، گیانی لەدەستداوە و تەرمەکەی گەیێندراوەتەوە پێنجوێن.
فەرمان، کە خەڵکی کرماشانە و شۆفێری یەکێک لە سێ تانکەرە سووتاوەکانە بە رووداوی گوت، ''بزوێنەری تانکەرەکەم تێکچووبوو و کاری نەدەکرد، دوو تانکەری دیکە پێکیاندادا و نەوتەکە چووە ژێر تانکەرەکەی من و ئەویش گڕی گرت."
فەرمان گوتیشی: ''بینیم کەسێک لە نێو بارهەڵگرەکەدا ماوەتەوە و ئاگر رێگەی نادات دەرباز بێت، نەمانتوانی رزگاری بکەین."
بەگوتەی پەیامنێری رووداو، بڕیارە گوتەبێژی هاتووچۆی سلێمانی سەردانی شوێنی رووداوەکە بکات و زانیاریی زیاتر لەسەر چۆنیێتیی رووداوەکە بخاتەڕوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ