رووداو دیجیتاڵ
دادگەی ئیستەنبووڵ بە تاوانی کوشتنی 'جیهان ئایماز'ی هونەرمەند، سزای زیندانی تاهەتایی بەسەر محەممەد جایمازی بکوژدا سەپاند.
جیهان ئایمازی تەمەن 30 ساڵ کاژێر 19:00ی رۆژی 2ی ئایاری 2023 کاتێك لە ناوچەی کادیکۆی ئیستەنبووڵ لە کەنار دەریا میوزیکی دەژەنی و گۆرانی دەگوت، محەممەد جایماز داوای گوتنی گۆرانیی (بۆت دەمرم تورکیام)ـی لێکرد.
لەبەر ئەوەی جیهان ئایماز داواکارییەکەی پەسند نەکرد، دەمەقاڵێ لە نێوانیان روویدا. محەممەد جایماز بە چەقۆ جیهان ئایمازی بریندار کرد و خستیە نێو ئاوەوە.
دوای گەیشتنی تیمەکانی پۆلیس و تەندروستی، جیهان ئایماز لە نێو ئاوەکە دەرهێنرا و گوێزرایەوە نەخۆشخانە و دواتر لەوێ گیانی لەدەستدا.
تاوانبار لە شوێنی رووداوەکە هەڵهات، بەڵام دواتر لەلایەن تیمەکانی ئاسایشەوە دەستبەسەرکرا.
محەممەد جایماز لە دادگەی سزا قورسەکانی ئیستەنبووڵ دادگایی کرا و سزای زیندانی تاهەتایی بەسەردا سەپێندرا.
جیهان ئایماز خەڵکی شارۆچکەی دیگۆر سەر بە پارێزگای قەرسی باکووری کوردستان بوو و لە ساڵی 2021ـەوە لە شەقامەکانی ئیستەنبووڵ گۆرانی دەگوت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ