بەرپرسی مەڵبەندی حیزبی شیوعی: پێدەچێت کۆبوونەوەی ئەنجوومەنی پارێزگای کەرکووک نەکرێت

 

رۆژی دووشەممە، 5ی شوباتی 2024، دڵشاد حەساری، بەرپرسی مەڵبەندی حیزبی شیوعیی کوردستان لە کەرکووک میوانی بەرنامەی نووڕۆژی تۆڕی میدیایی رووداو بوو، لەبارەی کۆبوونەوەی ئەنجوومەنی پارێزگای کەرکووکەوە گوتی، "ئەنجوومەنی پارێزگای کەرکووک بەنیازە ئەمڕۆ کۆببێتەوە. بەڵام ئەوەی ئێمە زانیومانە و ئاگامان لێیەتی، پێدەچێت ئەو کۆبوونەوەیە نەکرێت. چونکە لایەنی عەرەبی و تورکمانی تائێستا بەفەرمی رایاننەگەیاندووە کە بەشداری کۆبوونەوەکە دەکەن یان نا."

 

دڵشاد حەساری، دەشڵێت, "لە کۆبوونەوەی ئەنجوومەن، دەبێ رێژەی یاسایی تەواو ببێت، کە 50+1ـە، بەو ئومێدەی کە تەواوی کوتلەکان ئامادە بن و رێژەی یاسایی تەواو بکەن؛ تاوەکو شەرعییەتی خۆی وەربگرێت و لە کۆبوونەوەکان بەردەوام بن بۆ پێکهێنانی حکومەتی خۆجێیی و دیاریکردنی سەرۆکی ئەنجوومەنی پارێزگای کەرکووک."

 

لەبارەی بەکراوەیی مانەوەی کۆبوونەوەی ئەنجوومەنی پارێزگای کەرکووک، بەرپرسی مەڵبەندی حیزبی شیوعیی کوردستان لە کەرکووک دەڵێت، ئەگەر رێژەی یاسایی لە کۆبوونەوەی ئەنجوومەنی پارێزگای کەرکووک تەواو بێت، واتا 50+1 بێت، کۆبوونەوەکە بە کراوەیی دەمێنێتەوە. گرنگە و دەکرێ لە داهاتوودا گفتوگۆ لەبارەی پێکهێنانی حکومەتی خۆجێیی بکرێت. بەڵام لە هەندێک میدیا و سەکۆ پێشبینی دەکرێت، کۆبوونەوە و پرۆسەکە پەک بخرێت و ئەنجوومەن نەتوانێت کۆببێتەوە. ئەگەر نەکرێت کێشەی یاسایی بۆ دروست دەبێت."

 

رۆژی 21ـی کانوونى دووەم، کۆمیسیۆنى باڵاى سەربەخۆى ھەڵبژاردنەکانى عێراق ئەنجامى کۆتایی هەڵبژاردنى ئەنجوومەنى پارێزگاکانى پەسندکرد، کە رۆژی 18ـی کانوونی یەکەمی 2023، هەڵبژاردنی بۆ کرا.

 

رۆژی 29-01-2024، ئەندامانی هەڵبژێردراوی ئەنجوومەنی پارێزگای کەرکووک جگە لە پارێزگاری بەوەکالەت (راکان جبووری)، سوێندی یاساییان خوارد. دوای ئەو سوێندخواردنە بەفەرمی بوونە ئەندامی ئەنجوومەنی پارێزگای کەرکووک. بڕیارە ئەمڕۆ ئەندامانی ئەنجوومەنی پارێزگای کەرکووک لەبارەی هەڵبژاردنی سەرۆک و ئەندامانی ئەنجوومەن کۆببنەوە.

 

دڵشاد حەساری، بەرپرسی مەڵبەندی حیزبی شیوعی لە کەرکووک لەبارەی داخران و دروستبوونی کێشە بۆ کۆبوونەوەی ئەنجوومەنی کەرکووک ئاماژەی بەوەکرد، "لایەنی عەرەبی و تورکمانی تاوەکو ئێستا وەکو پێویست نەهاتوونەتە پێش، بەو مانایەی حکومەتی خۆجێیی دروست بکەن. ئەمەش نیگەرانیی کەرکووکییەکانی لێدەکەوێتەوە. هەموو پێکهاتەکان بۆ ئەوە نوێنەری خۆیان هەڵبژاردووە، ئەنجوومەنێکی باش و پارێزگایەکی باش و حکومەتێکی باشی خۆجێیی پێکبهێندرێن. بەڵام لە بەغدا و لایەنی هەرێمیشەوە، دەستوەردان هەیە."

 

لەبارەی بەربژێرکردنی کەسێک بۆ پارێزگاری کەرکووک، ئەو بەرپرسەی مەڵبەندی حیزبی شیوعیی کوردستان لە کەرکووک دووپاتی کردەوە، "تاوەکو ئێستا هیچ کەسێک لە لایەن عەرەب و تورکمانیشەوە دیاری نەکراوە بۆ پارێزگاری کەرکووک. بەڵام لایەنی کوردی لەسەر ئەوە کۆکن کە کەسێکی کورد بکرێتە پارێزگاری کەرکووک. بۆ هەڵبژاردنی پارێزگاریش پێویستە رێژەی یاسایی 50+1 تەواو ببێت. هاوکات پێویستی بە رێککەوتنی سیاسی لە نێوان کوتلەکانە. ناکرێ ئەندامی ئەنجوومەن و پارێزگار بە دڵی لایەنێک بێت، ئەوە هەڵەیەکی گەورەیە. زۆر خاڵی هاوبەش لە نێوان پێکهاتەکانی کەرکووکدا هەن، بە پێچەوانەوە رەنگە خەڵکی کەرکووک هەڵوێست وەربگرن."

 

لە ئەگەری هەڵوەشاندنەوەی ئەنجوومەنی پارێزگای کەرکووکدا، پێویستە سێ لەسەر یەکی ئەنجوومەنەکە خۆی، خۆی هەڵبوەشێنێتەوە، نەک هێزێک یان کەسێک بڕیار بدات ئەو ئەنجوومەنە هەڵبوەشێنێتەوە. دڵشاد حەساری دەڵێت "لە عێراقدا، بەپێی پێویست گرنگی بە کات و سەردەمی پارێزگاری بە وەکالەت نەدراوە، ئەگەر کات بۆ ئەو مەبەستە دیاری بکرابایە، نەدەبوو تائێستا راکان جبووری پارێزگاری کەرکووک بووبا. هەروەها لە نێو کوتلەکاندا دەتوانن سکاڵای یاسایی لەو بارەوە لە دادگەی فیردراڵی تۆمار بکەن. دیاریکردنی هەر پۆستێکی بەوەکالەت، دوای ساڵێک یاساییبوونی لەدەست دەدات. بۆیە لە رووی یاساییەوە ئەو بابەت یاسایی و دەستووری نییە."

 

سەبارەت بە کۆکی و رێککەوتنی لایەنی عەرەبی و تورکمانی، بەرپرسی مەڵبەندی حیزبی شیوعیی لە کەرکووک روونی دەکاتەوە، "دوێنێ شەو لایەنی عەرەبی و تورکمانی تاوەکو کاتژمێر 11ـی شەو لە کۆبوونەوەدا بوون، بەڵام هیچ خاڵێکی ئیجابی نەبووە تاوەکو ببێتە رێککەوتن لە نێوانیاندا. بۆیە کۆبوونەوەکە لەسەر دابەشکردنی پۆستەکان ناکۆن ئەنجامی نەبووە."