لە دهۆک ژنێک هاوژینی پێشووی بە چەقۆ دەکوژێت

 

هێمن سلێمان، گوتەبێژی پۆلیسی دهۆک بە تۆڕی میدیایی رووداوی راگەیاند، ژنەکە عەرەبە و تەمەنی 23 ساڵە، هاوژینی پێشووی کە تەمەنی 34 ساڵ بووە، بە چەقۆ کوشتووە و دواتر خۆی رادەستی هێزەکانی پۆلیس کردووە. 

 

بەگوێرەی زانیارییەکانی رووداو، ئەو ژنە لە یەکێک لە یانە شەوانەکانی دهۆک کاری کردووە و هاوژینەکەیشی کە ناوی (م، س، ص)ـە و کریستیانە، لە هەمان یانەی شەوانەدا پاسەوان بووە. 

 

رووداوەکە کاژێر 05:00ـی بەیانیی ئەمڕۆ هەینی، 02-06-2023، بووە. گوتەبێژی پۆلیسی دهۆک باس لەوە دەکات، لێکۆڵێنەوەیان لە رووداوەکە دەستپێکردووە و بەپێی ماددەی 405 لە یاسای سزادانی عێراقی، تۆمەتبار بەند کراوە و لێکۆڵینەوەی لەگەڵدا دەکرێت.

 

پەیامنێری رووداو لە دهۆک ریگەیاند، ژنەکە چەقۆیەکی لەسەر دڵی هاوژینی پێشووی داوە و پێش ئەوەی بگەیێندرێتە نەخۆشخانە، گیانی لەدەستداوە.