کولتوور و ستایل
ئەمبەر هێرد و جۆنی دێپ، لە کاتی یەکەم نمایشی فیلمی "کچی دانیمارکی". 21-11-2021. وێنە: VALERIE MACON / AFP
رووداو دیجیتاڵ
دادگەی ڤێرجینیای ئەمریکا بڕیاری کۆتایی لە بارەی دۆسیەی جۆنی دێپ، ئەستێرەی هۆڵیوود و ئەمبەر هێردی هاوژینی پێشووی دا.
دادگەکە تاوانی ناوزڕاندنی بەسەر هەردوو ئەکتەرە ئەمریکییەکەدا ساخکردەوە. جۆنی دێپ خۆی بە براوەی دۆسیەکە دەزانێت و دەڵێت: "دادوەرەکان ژیانیان بۆ گەڕاندمەوە"، ئەمبەر هێردیش "بێهیوابوونی" خۆی بەرامبەر بڕیارەکە دەخاتەڕوو.
دادگەی ڤێرجینیا رایگەیاند، ئەمبەر هێرد لە گوتارێکیدا لە ساڵی 2018 دەنگۆی ناڕاستی لە بارەی جۆنی دێپ بڵاوکردووەتەوە گوایە تووندوتیژیی سێکسیی بەرامبەر کردووە، بەو پێیە بڕیاریدا کە جۆنی دێپ بە 15 ملیۆن دۆلار قەرەبوو بکرێتەوە.
بەگوێرەی بڕیاری دەستەی دادوەرانی دادگاکە، جۆنی دێپیش تاوانبارە بە ناوزڕاندنی هاوژینی پێشووی و پێویستە بە دوو ملیۆن دۆلار قەرەبووی بکاتەوە.
دوای ئاشکراکردنی بڕیارەکە، جۆنی دێپ لە راگەیێندراوێکدا گوتی: "دادوەرەکان ژیانیان بۆ گەڕاندمەوە." بەڵام ئەمبەر هێرد بڕیارەکەی بە "بێهیواکەر و نسکۆ" بۆ ژنان ناوبرد.
لە راگەیێندراوێکدا، خانمە ئەکتەرە ئەمریکییەکە گوتی: "ئەو بێهوابوونەی هەستی پێدەکەم نایێتە زمان. دڵم شکاوە چونکە ئەو بەڵگانەی کە بە قەد شاخێک بوون بەس نەبوون بۆ وەستانەوە دژی هێز، هەژموون و کاریگەریی بێبەرابەری هاوژینی پێشووم."
هەروەها گوتیشی: "من تەنانەت زیاتر بێهیوام لە بەرامبەر ئەو واتایەی کە ئەم بڕیارە بۆ ژنانی دیکە هەیەتی. ئەمە نسکۆیە. پاشەکشە بەو بیرۆکە دەکات کە تووندوتیژیی دژی ژنان بە جیددی وەردەگیرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ