ئابووری
دۆناڵد ترەمپ لەکاتێکدا بە فڕۆکەی ئەیر فۆرس وەن دەگاتە فڕۆکەخانەی نێودەوڵەتیی پاڵم بیچ لە 28-3-2025، وێنە: AP /Manuel Balce Ceneta
prev
next
رووداو دیجیتاڵ
دۆناڵد ترەمپ، سەرۆکی ئەمریکا رایگەیاند، ئەو پێناسە گومرگیانەی بەنیازە لە چەند رۆژی داهاتوودا رایانبگەیێنێت، "هەموو وڵاتان" دەگرێتەوە، نەوەک تەنیا ئەو وڵاتانەی زۆرترین ناهاوسەنگیی بازرگانییان لەگەڵ ئەمریکادا هەیە.
ترەمپ، بەڵێنی داوە 2ـی نیسان "رۆژی رزگارکردن"ـی ئەمریکا بێت و لەو رۆژەدا پێناسی گومرگی بەسەر ئەو وڵاتانەدا بسەپێنێت، کە حکومەتکەی پێیوایە، وەک پێویست بەرهەمی ئەمریکی ناکڕن.
ترەمپ لەنێو فڕۆکەی ئەیر فۆرس وەن بە رۆژنامەڤانانی گوت، "لە هەموو وڵاتانەوە دەستپێدەکەین، با بزانین چی روودەدات."
بەم قسانە؛ ترەمپ هیوای پاشگەزبوونەوە لە هەڕەشەکانی نەهێشت.
لە وەڵامی ئەوەی 'ئایا کام وڵات زۆرترین باجی لەسەر دەسەپێنرێت؟' ترەمپ گوتی، ژمارەیان 10 بۆ 15 وڵات دەبێت.
گوتیشی، "لە بنەڕەتدا هەموو ئەو وڵاتانەی باسیان دەکەین، پێناسی گومرگی دەیانگرێتەوە. ئێمە باسی هەموو وڵاتەکانمان کردووە نەوەک تەنیا بەشێک."
پێشبینی دەکرێت، ترەمپ پێناسی گومرگی بەسەر 15٪ـی هاوبەشە بازرگانییەکانی ئەمریکا بسەپێنێت، کە ناهاوسەنگیی بازرگانییان لەگەڵ ئەمریکا هەیە، بەو واتەیەی، هێندە کاڵا هەناردەی ئەمریکا دەکەن، هێندە لێوەی هاوردە ناکەن.
ترەمپ دەڵێت، ئەو باجانەی بڕیارە بیانسەپێنێت، "بەخشندەتر" دەبن بەراورد بەوانەی بەسەر ئەمریکا سەپێنراون. "باجەکان زۆر بەخشندەتر دەبن لەوەی ئەو وڵاتانە بەرامبەر بە ئێمە کردوویانە، واتە میهرەبانتر دەبن لەوەی ئەو وڵاتانە لەماوەی دەیان ساڵدا لەگەڵ ئەمریکا کردوویانە".
ترەمپ گوتی، "ئەوان ئێمەیان رووتاندەوە کە هیچ وڵاتێک لە مێژوودا بەو شێوەیە نەڕووتێنراوەتەوە. ئێمە زۆر میهرەبانتر دەبین لەوان."
ترەمپ پێشتر پێناسی گومرگی بەسەر هاوردەکردنی پۆڵا و ئەلەمنیۆمدا سەپاند و گومرگی لەسەر چەندین کاڵای دیکەی چینیش زیادکرد.
هەروەها بڕیارە لە 3ـی نیسانەوە پێناسی گومرگی لەسەر ئۆتۆمبێلە هاوردەکراوەکانیش بچێتە واری جێبەجێکردنەوە.
پیتەر ناڤارۆ، یاریدەدەری باڵای بازرگانیی ترەمپ رایگەیاند، باج لەسەر هاوردەکردنی ئۆتۆمبێل دەتوانێت لە ساڵێکدا 100 ملیار دۆلار بۆ ئەمریکا بگەڕێنێتەوە.
ناڤارۆ لە لێدوانێکیدا بۆ فۆکس نیووز سەندەی گوتی: "جگە لەوەش، باجەکانی دیکە بڕیارە ساڵانە نزیکەی 600 ملیار دۆلار کۆبکەنەوە، کە دەکاتە نزیکەی 6 تریلیۆن دۆلار لە ماوەی 10 ساڵدا".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ