وەزارەتی دارایی: ئەو فەرمانبەرانەی خۆیان خانەنشین کردووە ناتوانن بگەڕێنەوە سەر کار

 

رۆژی دووشەممە 27-2-2023، بەڕێوەبەرایەتی گشتیی خانەنشینی هەرێمی کوردستان روونکردنەوەیەکی لەبارەی گشتاندنی دارایی ژمارە 20 بڵاوکردەوە کە تایبەتە بە پاداشتی خانەنشینی و تێیدا هاتووە: "بەپێی یاسا بەرکارەکان و یاسایی چاکسازی ئەو فەرمانبەرانەی خۆیان خانەنشین کردووە مافی گەڕانەوەیان بۆ کار نییە و ناتوانن بگەڕێنەوە سەر کار."

 

هەروەها هاتووە: "گشتاندنی دارایی ژمارە (20) تەنیا ئەو فەرمانبەرانە دەگرێتەوە، کە گەڕاونەتەوە سەر کار و دووبارە خانەنشین بوونەتەوە، واتە گەڕانەوە بۆ سەر کار ناگرێتەوە."

 

لە روونکردنەوەکەدا ئاماژە بە دوو خاڵ دراوە، کە بریتین لە:

 

1- بەپێی یاسا بەرکارەکان و یاسای چاکسازی ئەو فەرمانبەرانەی بەپێی یاسا واتە تەواوکردنی تەمەنی خانەنشینی، یان خۆیان خانەنشینبوون یان بە هۆکاری تەندروستی، مافی گەڕانەوەیان بۆ سەر کار نامێنێت.

 

2- گشتاندنی دارایی ژمارە (20) تەنیا ئەو خانەنشینانە دەگرێتەوە کە خانەنشین بوون و گەڕاونەتەوە سەر کار و دووبارە خانەنشین بوونەتەوە سوودمەند دەبن لە پاداشتی خانەنشینی ساڵە زیادەکانی خزمەتکردنیان.

 

وەزارەتی دارایی لە رۆژی 21-12-2022 رێنمایی دارایی بە ژمارە 20ـی دەرکرد کە تایبەت بوو بە پاداشتی خانەنشینی و ئاراستەی سەرجەم وەزارەت و فەرمانگەکانی نەبەستراو بە وەزارەتەکانی کردبوو.