هەفتەی داهاتوو چوار پرس شاندی لیژنەی دارایی پەرلەمانی عێراق دەهێنێتە هەولێر

 

پرسەکانی خاڵەسنورییەکان، خانەنشینی سەربازی، چاودێریی کۆمەڵایەتی و داهاتە نانەوتییەکان. ئەو پرسانەن لە نێو کۆبوونەوەکە شەن و کەو دەکرێن.

 

لەبارەی سەردانەکەوە عەتوان عەتوانی، سەرۆکی لیژنەی دارایی پەرلەمانی عێراق بە رووداوی گوت: "لەڕاستیدا سەردانەکە لەسەر خاڵە ناکۆکەکان دەوەستێت، هەروەها پشتیوانیکردنی لایەنە ئەرێنییەکان و چەسپاندنی ئەو رێککەوتنە و چارەسەرکردنی ناکۆکییەکان و داخستنی لاپەڕەی رابردوو دەبێت. ئەم ئیرادەیە هێزمان پێدەدات، لەسەر ئەوەی کۆتایی بە ناکۆکییەکان بێت هەرکاتێک وێنەکە روون بوو هەمووان زانیان ئەرکیان چییە؟ پابەندییەکانیان چییە؟ و بەڵێن بدەن بە پابەندبوونیان." 

 

دابەزینی نرخی نەوت و مەترسیی زیادبوونی کورتهێنان لیژنەی دارایی پەرلەمان ناچار دەکات هەوڵەکان بۆ چاودێری و کۆکردنەوەی داهاتە نانەوتییەکان چڕبکاتەوە.

 

نەرمین مەعروف، ئەندامی لیژنەی دارایی پەرلەمانی عێراق دەڵێت: "ئاشکرایە ئێستا نرخی نەوتی خاو لە بازاڕەکانی جیهاندا هاتووەتە خوارەوە، ئەمەش مەترسی دروست دەکات بۆ سەر بودجە و پابەندبوونەکانی حکومەت و ئەرک و بەرپرسیارەتییەکانی کە پشت بەستە بەداهاتی نەوت بۆیە بابەتی بەهێزکردنی داهاتە نانەوتییەکان و کۆکردنەوەی تەواوی ئەو داهاتەی خەمڵاندنی بۆ کراوە ئەرکی لیژنەی داراییە، کە بەدواداچوون بکات بۆ هەموو دامودەزگەکان."

 

بەدواداچوون بۆ ئاستی پابەندبوونی هەولێر و بەغدا لەسەر رێککەوتنی شاندی وەزاری و حکومەتی هەرێمی کوردستان یەکێک لە پرسە سەرەکییەکانی نێو کۆبوونەوەکانی هەولێر دەبێت.

 

شاندەکان لەسەر ئاستی سیاسی، وەزاری و هونەری لە نێوان بەغدا و هەولێر دەیان کۆبوونەوەیان ئەنجامداوە، کەچی تاوەکو ئێستا دواکەوتنی مووچەی مانگانەی مووچەخۆرانی هەرێمی کوردستان بەردەوامە، بۆ هەر مانگێک هۆکارێک دەدۆزرێتەوە بۆ ئەوەی مووچەی فەرمانبەرانی هەرێمی کوردستان دوابکەوێت.