ئابووری
کۆبوونەوەی محەممەد شیاع سوودانی، سەرۆکوەزیرانی عێراق لەگەڵ محەممەد حەلبووسی، سەرۆکی پەرلەمان
رووداو دیجیتاڵ
سەرۆکوەزیرانی عێراق لە کۆبوونەوەی لەگەڵ سەرۆکی پەرلەمانی عێراق جەخت لە گرنگی پەلەکردن لە پەسندکردنی پڕۆژەیاسای بودجە دەکاتەوە.
ئێوارەی ئەمڕۆ سێشەممە، 09-05-2023، محەممەد شیاع سوودانی، سەرۆکوەزیرانی عێراق پێشوازی لە محەممەد حەلبووسی، سەرۆکی پەرلەمان کرد و هەردوولا گفتوگۆیان لەبارەی دۆسیە گشتییەکانی وڵات کرد.
بەپێی راگەیێندراوی نووسینگەی سەرۆکوەزیرانی عێراق، لە دیدارەکەدا سوودانی جەختی لە گرنگیی پێکەوەکارکردنی نێوان حکومەت و پەرلەمان کردووەتەوە، ئەوەش بە مەبەستی جێبەجێکردنی بەرنامەی حکومەت و دابینکردنی خزمەتگوزارییەکان بۆ هاووڵاتییان.
بە گوێرەی راگەیێندراوەکە، سوودانی بە پێویستی زانیوە زوو پڕۆژەیاسای بودجە پەسندبکرێت بۆ ئەوەی حکومەت بتوانێت بەرنامەکەی بە تەواوی جێبەجێ بکات و ئابووریی وڵات ببووژێنێتەوە.
بودجەی عێراق زیاتر لە 199 تریلیۆن دینارە و 12.67٪ـی بۆ هەرێمی کوردستان دانراوە کە زیاتر لە 16 تریلیۆن دەکات. پەرلەمانی عێراق خوێندنەوەی دووەمی بۆ پڕۆژەیاسای بودجە کردووە و ئێستا سەرقاڵی میواندارییکردنی وەزیر و دەستە و لایەنە پەیوەندیدارەکانە.
هاوپەیمانیی بەڕێوەبردنی دەوڵەت لە کۆبوونەوەی رۆژی 01-05-2023، سەبارەت بە گفتوگۆکانی بودجە رایگەیاند، "رۆژی 10-05-2023 دوایین وادەیە بۆ یەکلاکردنەوەی گفتوگۆکانی رەشنووسی بودجە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ