رووداو دیجیتاڵ
وەزیری نەوتی عێراق لە هەڤپەیڤینێکدا لەگەڵ تۆڕی میدیایی رووداو باس لە چارەنووسی نەوتی هەرێمی کوردستان و هەناردەکردنەوەی بۆ بازاڕەکانی جیهان دەکات، ئاشکراشی دەکات لەگەڵ وەزارەتی سامانە سرووشتییەکانی هەرێمی کوردستان لە گفتوگۆدان لەبارەی پلانێکی جێگرەوە ئەگەر نەوتەکە هەناردە نەکرێت.
حەیان عەبدولغەنی، وەزیری نەوتی عێراق و جێگری سەرۆکوەزیرانی عێراق بۆ کاروباری وزە میوانی بەرنامەی رووداوی ئەمڕۆ-ی تۆڕی میدیایی رووداوە کە شەوی دووشەممە کاژێر 21:00 بە کاتی هەولێر پەخش دەکرێت.
وەزیری نەوت لە بەرنامەکەدا ئاشکرای دەکات، گرێبەستەکانی فرۆشتنی نەوتی هەرێمی کوردستان لەگەڵ ئەو لایەنانەی دەیکڕن تەواوبووە و بەگوێرەی گرێبەستە واژۆکراوەکان لەلایەن کۆمپانیای بەبازاڕکردنی نەوتی عێراق ناسراو بە سۆمۆ، نەوتی هەرێمی کوردستان بە هەمان نرخی جیهانی دەفرۆشرێت کە سۆمۆ دیاری دەکات و هیچ گۆڕانکارییەکی تێدا ناکرێت.
حەیان عەبدولغەنی ئاماژە بەوەش دەکات، لایەنی تورکییان بە فەرمیی ئاگادارکردووەتەوە کە ئامادەن بۆ هەناردەکردنی نەوت و چاوەڕوانی شاندێکی تورکی دەکەن کە سەردانی عێراق بکەن بۆ یەکلاکردنەوەی پرسی هەناردەکردنی نەوتی هەرێمی کوردستان.
لە ئەگەری بەردەوامیی راگرتنی هەناردەی نەوتی هەرێمی کوردستان، وەزیری نەوتی عێراق لە بەرنامەکەدا پلانێک ئاشکرا دەکات کە لەگەڵ وەزارەتی سامانە سرووشتییەکانی هەرێمی کوردستان گفتوگۆی لەبارەوە کراوە، بۆ نەوتی هەرێمی کوردستان.
وەک حەیان عەبدولغەنی دەڵێت، لیژنەیەک پێداچوونەوە بە گرێبەستە نەوتییەکانی هەرێمی کوردستان دەکات و چارەنووسی ئەو گرێبەستانە یەکلادەکاتەوە.
وەزیری نەوتی عێراق باس لە بەنزین بە نرخی 450 دینار و ناردنی نەوتی سپی بۆ هەرێمی کوردستان دەکات و دەڵێت، گفتوگۆی لەبارەوە کراوە و زانیاری لەسەر ئەو بابەتانە ئاشکرا دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ