Hewlêr (Rûdaw) - Serokê Parlamentoya Tirkiyeyê Numan Kurtulmuş ragihand ku cihê çareseriya hemû pirsgirêkan parlamento ye û di pêvajoyê de jî dê parlamento berpirsyariya xwe bi cih bîne.
Serokê Parlamentoya Tirkiyeyê Numan Kurtulmuş doh di bernameya fitarê de li gel nûnerên saziyên ragihandinê civiya û bersiv da pirsên wan.
Numan Kurtulmuş li ser pirsa “Di mijara Tirkiyeke bêteror de hûn dê li parlamentoyê rûniştina girtî bikin?” got:
“Pêvajo bi awayekî zelal tê birêvebirin û cihê ku hemû pirsgirêk bên çareserkirin parlamento ye.”
“Pirsgirêk dê bi helwesta hevbeş a partiyan bê çareserkirin”
Kurtulmuş bi bîr xist ku Şandeya Îmraliyê ya DEM Partiyê ewil bi wî re hevdîtin kiriye û wiha domand:
“Şandeyê behsa tiştên bên kirin, nexşeya rê û naverokê kir.
Me jî girêdayî mijarê behsa çarçoveya giştî kir. Piştî wê çûn serdana partiyan û hefteyê dubare partiyan ziyaret dikin.
Jixwe Parlamentoya Tirkiyeyê cihê çareseriya hemû pirsgirêkên Tirkiyeyê ye.
Ji ber vê yekê jî pirsgirêk dê bi helwesta hevbeş a partiyên siyasî bê çareserkirin.
Parlamento dê di encam de berpirsiyariya xwe bi cih bîne.”
Kurtulmuş derbarê amadekirina destûreke nû ya sivîl jî got ku kar û xebatên wan berê dest pê kirine û pêwîstiya Tirkiyeyê bi destûreke nû heye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse