Hêzên ewlehiyê yên Sûriyeyê / Wêne: Ji ber dîmenan, Rûdaw
Şam (Rûdaw) - Li bajarên Laziqiyê û Ceblê yên Sûriyeyê di navbera komên çekdar û hêzên Wezareta Parastinê ya Sûriyeyê de şer û pevçûnên dijwar derketin.
Hêzên Wezareta Parastinê ya Sûriyeyê dibêjin ku ew êrişî pêkhateyan nakin û komên çekdar ên ku êrişî wan dikin bermahiyên rejîma berê ne.
Endamekî hêzên Wezareta Parastinê ya Sûriyeyê anî ziman:
“Em li vir dibêjin ku ev şer di navbera leşkerên Sûriyeyê û bermahiyên rejîma berê de ye.
Em ne li dijî pêkhate û olan in.
Wan kar û hevahengî bi serkêşiya leşkerên Firqeya Çaran û Zêrevaniya Cimhûrî yên reviyayî re dikir.
Ew heta niha bawer nakin ku em artêşeke pispor û bi sazî ne.”
Li gorî zanyariyên taybet ên Rûdawê, operasyonên leşkerî li bajarê Laziqiyeyê û Banyasê bi dawî bûne û niha Hêzên Ewlehiya Giştî li endamên komên çekdar di nava malan de digerin.
Piştre jî ew dê berê xwe bidin bajarê Ceblê û hemû bajarên berava Sûriyeyê.
“Li pey bermahiyên rejîma berê ketin”
Endamekî Hêzên Ewlehiya Giştî jî got:
“Hêzên ewlehiya navxwe li pey bermahiyên rejîma berê ketin.
Îro danê sibehê, şikir ji Xwedê re, aramî hêdî hêdî vedigere û em dê li pey bermahiyên rejîma berê bikevin heta ku aramî û aştî vegere hemû berava Sûriyeyê.”
Di encama şer de nêzîkî 70 kesî ji her du aliyan hatin kuştin û bi dehan jî birîndar hene.
Ji bo sepandina ewlehiyê jî, qedexeya derketina derve li Laziqiye û Tertûsê şeva borî hat ragihandin.
Hêzên ewlehiyê tekez dikin ku rewş di bin kontrolê de ye.
Xelkê sivîl jî dibêje ku ew ji şer westiyane û divê Sûriyeya nû bi aramî û bê qurbanî were avakirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse